தாய்வழி மற்றும் பிறந்த குழந்தைகளுக்கான டெட்டனஸ் நோயை ஒழித்த நிலையை 10 ஆண்டுகளாகத் தொடர்ந்து பேணியமைக்கும், மலேரியா இல்லாத நிலையை ஒரு தசாப்த காலமாகப் பேணியமைக்கும் உலக சுகாதார ஸ்தாபனம் (WHO) இலங்கைக்கு வாழ்த்து தெரிவித்துள்ளது.
செப்டெம்பர் 8ஆம் திகதியிடப்பட்ட சான்றிதழொன்றின் மூலம், WHO இன் தென்கிழக்காசிய பிராந்திய அலுவலகம், பொது சுகாதாரம் மற்றும் நோய் ஒழிப்புக்காக இலங்கை தொடர்ந்து வெளிப்படுத்தி வரும் அர்ப்பணிப்பைப் பாராட்டியுள்ளது.
வலுவான தேசிய அர்ப்பணிப்பு, உயர்தர நோய்த்தடுப்பு சேவைகள், பாதுகாப்பான பிரசவ நடைமுறைகள் மற்றும் மலேரியா மீண்டும் பரவுவதைத் தடுப்பதற்கான தொடர்ச்சியான கண்காணிப்பு ஆகியவையே இந்த சாதனைகளுக்கு காரணமாக அமைந்துள்ளதாக WHO தெரிவித்துள்ளது.
2016ஆம் ஆண்டு WHO இனால் மலேரியா இல்லாத நாடாகச் சான்றளிக்கப்பட்டதைத் தொடர்ந்து, இலங்கை கடந்த 10 ஆண்டுகளாக மலேரியா இல்லாத நிலையைப் பேணியுள்ளது.
