எச்.ஐ.வி. (HIV) மற்றும் ஏனைய பாலியல் ரீதியாகப் பரவும் தொற்றுகளை (STIs) தடுப்பதற்காக ஆணுறைகளை சரியாகவும் தொடர்ச்சியாகவும் பயன்படுத்துமாறு சுகாதார அதிகாரிகள் பொதுமக்களிடம் கோரிக்கை விடுத்துள்ளதுடன், தரமற்ற ஆணுறைகளைப் பயன்படுத்துவதைத் தவிர்க்குமாறும் எச்சரித்துள்ளனர்.
HIV பரிசோதனைகளை விரிவுபடுத்துதல் மற்றும் தடுப்பு சேவைகளுக்கான அணுகலை மேம்படுத்துதல் ஆகியவற்றை நோக்கமாகக் கொண்டு தேசிய பாலியல் நோய் மற்றும் எய்ட்ஸ் கட்டுப்பாட்டுத் திட்டம் (NSACP) முன்னெடுத்து வரும் நடவடிக்கைகளின் போது இந்த அறிவுறுத்தல் விடுக்கப்பட்டுள்ளது.
இந்த முயற்சிகளின் ஒரு பகுதியாக, HIV சுய பரிசோதனை, உயர்தர ஆணுறைகள் மற்றும் லூப்ரிகன்ட்களை இரகசியமான முறையில் பெற்றுக்கொள்வது உள்ளிட்ட HIV தடுப்பு மற்றும் பரிசோதனை சேவைகளைப் பெறுவதற்கு ‘KNOW4SURE.LK’ இணையவழி முறைமையைப் பயன்படுத்துமாறு NSACP பொதுமக்களை ஊக்குவிக்கிறது.
கிளினிக்குகளுக்குச் செல்ல தயங்கும் நபர்களுக்கு இந்த டிஜிட்டல் முறைமை ஊடாக எளிதாகவும் இரகசியத்தன்மையைப் பாதுகாத்தும் HIV தொடர்பான சேவைகளைப் பெற்றுக்கொள்ள முடியும் என தேசிய பாலியல் நோய் மற்றும் எய்ட்ஸ் கட்டுப்பாட்டுத் திட்டத்தின் விசேட வைத்திய நிபுணர் டாக்டர் வினோ தர்மகுலசிங்க ‘டெய்லி மிரர்’ பத்திரிகைக்கு தெரிவித்துள்ளார்.
இந்த இணையத்தளத்தின் ஊடாக பயனர்கள் தங்களுக்கு உள்ள HIV அல்லது பாலியல் ரீதியாகப் பரவும் தொற்று அபாயத்தை சுயமாக மதிப்பிடவும், HIV சுய பரிசோதனை சேவைகளைப் பெறவும், அருகிலுள்ள பரிசோதனை நிலையங்களை அடையாளம் காணவும், HIV பரிசோதனைக்கான நேரத்தை முன்பதிவு செய்யவும் முடியும்.
“தங்களது இரகசியத்தன்மையைப் பாதுகாத்துக்கொண்டு HIV தொடர்பான தங்களது ஆபத்தை அறிந்துகொள்ளவும் பரிசோதனை சேவைகளைப் பெறவும் இந்த முறைமையைப் பயன்படுத்தலாம். HIV பரிசோதனைகளின் எண்ணிக்கையை அதிகரிப்பதற்கும் தொற்றுகளை ஆரம்ப நிலையிலேயே கண்டறிவதற்கும் அதிகமானோர் இந்த சேவையைப் பயன்படுத்துவார்கள் என நாங்கள் எதிர்பார்க்கிறோம்” என டாக்டர் தர்மகுலசிங்க தெரிவித்துள்ளார்.
மேலும், ஆணுறைகள், லூப்ரிகன்ட்கள் மற்றும் HIV பரிசோதனைக் கருவிகளை இந்த முறைமை ஊடாக ஆர்டர் செய்ய முடிவதால், HIV தடுப்பு மற்றும் பரிசோதனைக்குத் தேவையான பொருட்களை பாதுகாப்பாகவும் இரகசியமாகவும் பெற்றுக்கொள்ளும் வாய்ப்பு கிடைக்கிறது.
பாலியல் தொடர்புகளின்போது HIV மற்றும் ஏனைய பாலியல் ரீதியாகப் பரவும் தொற்றுகளிலிருந்து உரிய பாதுகாப்பைப் பெறுவதற்கு ஆணுறைகளை சரியாகவும் தொடர்ச்சியாகவும் பயன்படுத்த வேண்டும் என சுகாதார அதிகாரிகள் வலியுறுத்துகின்றனர். நம்பகமான மூலங்களிலிருந்து மாத்திரம் ஆணுறைகளைப் பெற்றுக்கொள்வதுடன், அவற்றின் செயல்திறனைப் பாதிக்கக்கூடிய தரமற்ற தயாரிப்புகளைத் தவிர்க்குமாறும் அவர்கள் அறிவுறுத்துகின்றனர்.
அரசாங்க கிளினிக்குகள் அல்லது தெரிவுசெய்யப்பட்ட தனியார் வைத்தியர்கள் ஊடாக பரிசோதனை சேவைகளுக்கான நேரத்தை முன்பதிவு செய்ய முடியும். அரசாங்க கிளினிக்குகளில் HIV பரிசோதனைகள் முற்றிலும் இலவசமாக மேற்கொள்ளப்படுகின்றன. தனியார் நிறுவனங்களில் இதற்காக சிறிய கட்டணம் அறவிடப்படலாம்.
தற்போது அதிக ஆபத்துள்ள மற்றும் பாதிப்புக்குள்ளாகக்கூடிய பலர் சமூக ஊடகங்கள் மற்றும் டேட்டிங் செயலிகள் மூலம் துணைகளை அடையாளம் கண்டுகொண்டாலும், அவர்கள் பாரம்பரிய HIV தடுப்பு, பரிசோதனை அல்லது சிகிச்சை சேவைகளுடன் தொடர்புபடாத போக்கு காணப்படுவதால் இந்த இணையவழி முறைமை மிகவும் முக்கியமானது என டாக்டர் தர்மகுலசிங்க மேலும் தெரிவித்துள்ளார்.
