2020 முதல் 2026 வரையான காலப்பகுதியில் இலங்கையில் சட்டத்தரணிகளால் சந்தேகத்திற்கிடமான பரிவர்த்தனைகள் தொடர்பில் இரண்டு அறிக்கைகள் மட்டுமே சமர்ப்பிக்கப்பட்டுள்ளதாக இலங்கை மத்திய வங்கி தெரிவித்துள்ளது.
இலங்கை சட்டத்தரணிகள் சங்கத்தினால் ஏற்பாடு செய்யப்பட்ட மாநாட்டில் உரையாற்றிய மத்திய வங்கி ஆளுநர் கலாநிதி நந்தலால் வீரசிங்க, இந்த நிலைமை மிகவும் கவலைக்குரியது எனத் தெரிவித்தார்.
நிதிப் பரிவர்த்தனைகள் அறிக்கையிடல் சட்டத்தின் கீழ் சட்டத்தரணிகள் மற்றும் நோட்டரிகள் பொறுப்புக்கூற வேண்டிய தரப்பினராக குறிப்பிடப்பட்டுள்ளதால், சொத்து பரிவர்த்தனைகள், வாடிக்கையாளர்களின் பணத்தை நிர்வகித்தல் மற்றும் நிறுவனங்கள் அல்லது அறக்கட்டளைகளை நிறுவுதல் தொடர்பில் இடம்பெறும் சந்தேகத்திற்கிடமான பரிவர்த்தனைகளை நிதிப் புலனாய்வுப் பிரிவுக்கு அறிவிப்பது அவர்களின் சட்டபூர்வ கடமை என மத்திய வங்கி ஆளுநர் சுட்டிக்காட்டினார்.
இவ்வாறான அறிக்கைகள் இரண்டு வேலை நாட்களுக்குள் சமர்ப்பிக்கப்பட வேண்டும் எனவும் அவர் தெரிவித்தார்.
ஒக்டோபர் 26 முதல் நவம்பர் 6 வரை நடைபெறவுள்ள ஆசிய-பசுபிக் பணச்சலவைத் தடுப்புக் குழுவின் (APG) மதிப்பீட்டுக்கு முன்னதாக இலங்கையின் சட்டத்துறையின் செயற்பாட்டு பங்களிப்பு மிகவும் அவசியமானது எனவும் மத்திய வங்கி ஆளுநர் குறிப்பிட்டார்.
இந்தக் குறைபாட்டை ஏற்றுக்கொண்ட இலங்கை சட்டத்தரணிகள் சங்கத்தின் தலைவர் ரஜீவ் அமரசூரிய, சட்டவிரோதமாகப் பெறப்பட்ட பணத்தை சட்டபூர்வமான பணமாக மாற்றுவதற்குப் பயன்படுத்தப்படும் வழிமுறைகளைத் தடுப்பதில் சட்டத்தரணிகள் முன்னிலை வகிக்க வேண்டும் எனத் தெரிவித்தார்.
மேலும், பணச்சலவைத் தடுப்புப் பணிக்குழுவின் தலைவரும் ஓய்வுபெற்ற உயர் நீதிமன்ற நீதியரசருமான புவனேக அலுவிஹாரே, சட்டத்தரணி–வாடிக்கையாளர் இரகசியத்தன்மையைப் பாதுகாக்கும் உரிமையானது குற்றச் செயல்கள் மூலம் பெறப்பட்ட பணத்தை மறைப்பதற்கான ஒரு கேடயமாக பயன்படுத்தப்படக்கூடாது என வலியுறுத்தினார்.
