எதிர்வரும் 30ஆம் திகதி இலங்கை மத்திய வங்கி அடுத்தடுத்த நாணயக் கொள்கைத் தீர்மானத்தை அறிவிக்கவுள்ள நிலையில், அப்போது வட்டி வீதங்களில் மாற்றம் ஏற்படாது என ஃபர்ஸ்ட் கெப்பிட்டல் நிதி ஆய்வு நிறுவனம் கணித்துள்ளது.
அந்நிறுவனம் வெளியிட்டுள்ள முன்னோடி ஆய்வில், மத்திய வங்கி தனது ஒருநாள் கொள்கை வட்டி வீதத்தை 8.75 சதவீத மட்டத்தில் தொடர்ந்து பேணுவதற்கு 60 சதவீத வாய்ப்புள்ளதாகத் தெரிவிக்கப்பட்டுள்ளது.
அதேவேளை, வட்டி வீதத்தை 50 அடிப்படைப் புள்ளிகளால் அதிகரிப்பதற்கு 40 சதவீத வாய்ப்புள்ளதாகவும் அந்த ஆய்வில் குறிப்பிடப்பட்டுள்ளது.
மே மாதத்தில் மேற்கொள்ளப்பட்ட 100 அடிப்படைப் புள்ளிகளுக்கான வட்டி வீத அதிகரிப்பின் தாக்கம் பொருளாதாரத்தில் தொடர்ந்தும் காணப்படுவது இந்தக் கணிப்புக்கான காரணங்களில் ஒன்றாக ஃபர்ஸ்ட் கெப்பிட்டல் நிறுவனம் சுட்டிக்காட்டியுள்ளது.
மேலும், எதிர்வரும் செவ்வாய்க்கிழமை முதல் நடைமுறைக்கு வரும் புதிய ஒதுக்கீட்டுத் தேவைகளில் ஏற்படும் மாற்றங்கள் மூலம், மேலும் வட்டி வீதங்களை அதிகரிக்காமல் வங்கித் தொகுதியில் காணப்படும் மேலதிக திரவத்தன்மையை உறிஞ்சிக்கொள்ள முடியும் எனவும் அந்த நிறுவனம் தெரிவித்துள்ளது.
மத்திய வங்கியின் 5 சதவீத இலக்கை விட அதிகமாக ஆகஸ்ட் மாதத்தில் பணவீக்கம் 8 சதவீதமாக உயர்ந்துள்ளதுடன், ஜூலை மாதத்தில் நாட்டின் வர்த்தகப் பற்றாக்குறை ஒரு பில்லியன் அமெரிக்க டொலர்களைத் தாண்டி விரிவடைந்துள்ளது.
எவ்வாறாயினும், அதிகரித்து வரும் உலகளாவிய எண்ணெய் விலைகள் மற்றும் எல் நினோ தாக்கத்தால் ஏற்படக்கூடிய உணவுப் பொருட்களின் விலை அதிகரிப்பு அபாயங்களும் மத்திய வங்கியின் தீர்மானத்தில் தாக்கத்தை ஏற்படுத்தக்கூடிய காரணிகளாக இருக்கலாம் என ஃபர்ஸ்ட் கெப்பிட்டல் நிறுவனம் சுட்டிக்காட்டியுள்ளது.
