2026 ஜூலை மாதத்திற்கான பெறுமதி சேர் வரி (VAT) ஆகஸ்ட் 20ஆம் திகதிக்கு முன்னர் செலுத்தப்பட வேண்டும் என உள்நாட்டு இறைவரித் திணைக்களம் வரி செலுத்துவோருக்கு அறிவித்துள்ளது.
வரி செலுத்தத் தவறினால் அல்லது தாமதமாகச் செலுத்தினால் அபராதம் விதிக்கப்படும் எனவும் திணைக்களம் வலியுறுத்தியுள்ளது.
காசோலை, வங்கி வரைவோலை அல்லது கொடுப்பனவு ஆணை மூலம் மேற்கொள்ளப்படும் பணம் செலுத்தல், உரிய திகதிக்குப் பின்னர் கிடைத்தால் அதுவும் தாமதமான கொடுப்பனவாகக் கருதப்படும் என திணைக்களம் தெரிவித்துள்ளது.
இதனிடையே, ஜூலை மாதத்திற்கான VAT அறிக்கைகளை ஆகஸ்ட் 31ஆம் திகதி அல்லது அதற்கு முன்னர் இணையவழி முறையில் சமர்ப்பிக்க வேண்டும்.
மேலும், நிறுத்திவைக்கப்பட்ட வரியை ஆகஸ்ட் 15ஆம் திகதி அல்லது அதற்கு முன்னர் செலுத்துமாறு உள்நாட்டு இறைவரித் திணைக்களம் வரி செலுத்துவோரிடம் கோரியுள்ளது.
ஜூலை மாதத்திற்கான சமூக பாதுகாப்பு பங்களிப்பு வரியையும் ஆகஸ்ட் 20ஆம் திகதி அல்லது அதற்கு முன்னர் செலுத்த வேண்டும் என திணைக்களம் நினைவூட்டியுள்ளது.
