நாடு முழுவதும் எரிபொருள் தட்டுப்பாடோ அல்லது விநியோகத்தில் தடையோ இல்லை என்பதால், பதற்றமடைந்து எரிபொருளைச் சேமிப்பதைத் தவிர்க்குமாறு இலங்கை பெற்றோலிய தனியார் பவுசர் உரிமையாளர்கள் சங்கம் பொதுமக்களிடம் கோரிக்கை விடுத்துள்ளது.
சங்கத்தின் தலைவர் ஏ. எம். எச். அதிகாரி தெரிவிக்கையில், சில எரிபொருள் நிரப்பு நிலையங்கள் உரிய நேரத்தில் எரிபொருளை ஆர்டர் செய்யாததன் காரணமாக சில எரிபொருள் நிரப்பு நிலையங்களில் வரிசைகள் காணப்பட்டதாகக் குறிப்பிட்டுள்ளார்.
எரிபொருள் போக்குவரத்துக்கான கமிஷன் கட்டணம் தொடர்பில் கருத்து தெரிவித்த அவர், தற்போது நடைமுறையில் உள்ள கமிஷன் தொகையை கணக்கிடும் சூத்திரம் திருத்தப்பட வேண்டும் எனத் தெரிவித்துள்ளார்.
தற்போதைய சூத்திரத்தில் மலைநாடு மற்றும் தென் மாகாணங்களுக்கான போக்குவரத்து கமிஷன் கட்டணங்கள் உரிய முறையில் கருத்தில் கொள்ளப்படவில்லை எனவும் அவர் குறிப்பிட்டுள்ளார்.
இது தொடர்பில் சங்கம் கோரிக்கை ஒன்றை முன்வைத்துள்ளதாகவும், விடுபட்டுள்ள கமிஷன் பகுதிகளையும் உள்ளடக்கும் வகையில் குறித்த சூத்திரத்தை திருத்துவதற்கான நடவடிக்கைகள் தற்போது முன்னெடுக்கப்பட்டு வருவதாகவும் அவர் மேலும் தெரிவித்துள்ளார்.
