வாகன இலக்கத் தகடுகளுக்கான தட்டுப்பாட்டை அடுத்த ஆறு மாதங்களுக்குள் முழுமையாகத் தீர்க்க எதிர்பார்த்துள்ளதாக மோட்டார் போக்குவரத்து ஆணையாளர் நாயகம் துஷார பெர்னாண்டோ தெரிவித்துள்ளார்.
மார்ச் 10ஆம் திகதி புதிய ஒப்பந்ததாரர் ஒருவர் இலக்கத் தகடுகளை உற்பத்தி செய்யத் தொடங்கியதிலிருந்து இதுவரை சுமார் 62,000 இலக்கத் தகடுகள் உற்பத்தி செய்யப்பட்டுள்ளதாக அவர் தெரிவித்தார்.
2023 மற்றும் 2024ஆம் ஆண்டுகளில் பதிவு செய்யப்பட்ட வாகனங்களுக்கான சுமார் 32,000 இலக்கத் தகடுகள் இன்னும் வழங்கப்படாமல் நிலுவையில் உள்ளதாகவும் அவர் குறிப்பிட்டார்.
இந்தத் தட்டுப்பாட்டை நிவர்த்தி செய்வதற்கான மற்றுமொரு நடவடிக்கையாக, 2025ஆம் ஆண்டில் பதிவு செய்யப்பட்ட வாகனங்களுக்கான இலக்கத் தகடுகளை வழங்குவது தொடர்பான புதிய ஒப்பந்தம் அடுத்த வாரம் கைச்சாத்திடப்படவுள்ளதாகவும் மோட்டார் போக்குவரத்து ஆணையாளர் நாயகம் தெரிவித்தார்.
இலக்கத் தகடு தட்டுப்பாடு முழுமையாகத் தீர்க்கப்பட்ட பின்னர், வாகனம் பதிவு செய்யப்பட்ட ஏழு நாட்களுக்குள் இலக்கத் தகடுகளை வழங்குவதற்கு மோட்டார் போக்குவரத்து திணைக்களம் எதிர்பார்த்துள்ளதாகவும் அவர் கூறினார்.
அத்துடன், கார்கள், முச்சக்கர வண்டிகள், மோட்டார் சைக்கிள்கள் மற்றும் SUV வாகனங்கள் உள்ளிட்ட அனைத்து மின்சார வாகனங்களுக்கும் விசேட பச்சை நிற இலக்கத் தகடுகள் வழங்கப்படும் என்றும் அவர் தெரிவித்தார்.
இந்தப் பச்சை நிற இலக்கத் தகடுகள் வாகனத்தின் முன்புறம் மற்றும் பின்புறம் ஆகிய இரு பக்கங்களிலும் பொருத்துவதற்காக வழங்கப்படும்.
மேலும், வாகனத்தின் பதிவு செய்யப்பட்ட உரிமையாளரே கட்டாயமாக அந்த வாகனத்தை செலுத்த வேண்டும் என்ற அவசியமில்லை எனவும் அவர் தெளிவுபடுத்தினார். ஒரு நபருக்குச் சொந்தமான வாகனத்தை அவரது கணவர், மனைவி அல்லது பிள்ளை செலுத்த முடியும் என்றும் அவர் குறிப்பிட்டார்.
எவ்வாறாயினும், ஒரு வாகனம் வேறு நிறுவனத்திற்கோ அல்லது தரப்பினருக்கோ வாடகை அடிப்படையில் வழங்கப்பட்டால், அது உரிய வாடகை காப்புறுதி (Hiring Insurance) பாதுகாப்பின் கீழ் செலுத்தப்பட வேண்டும் என்றும் அவர் மேலும் தெரிவித்தார்.
