ஹல்துமுல்ல, சொரகுணே உப தபால் அலுவலகத்தில் பணியாற்றும் கடித விநியோகஸ்தர் ஒருவர், விநியோகிக்க வேண்டிய 2,078 கடிதங்களை விநியோகிக்காமல் தனது வீட்டில் மெத்தையின் கீழ் மறைத்து வைத்திருந்த நிலையில் கண்டுபிடிக்கப்பட்டுள்ளதாக ஹல்துமுல்ல பொலிஸார் தெரிவித்துள்ளனர்.
இவ்வாறு சிக்கியவர் சொரகுணே உப தபால் அலுவலகத்துடன் இணைக்கப்பட்டு பணியாற்றும் தபால் ஊழியர் எனப் பொலிஸார் குறிப்பிட்டுள்ளனர்.
சந்தேகநபரின் வீட்டில் சட்டவிரோத மதுபானம் (கசிப்பு) இருப்பதாக ஹல்துமுல்ல பொலிஸ் நிலையப் பொறுப்பதிகாரி பொலிஸ் பரிசோதகர் அசோக இந்துனில் ரத்நாயக்கவுக்கு கிடைத்த தகவலின் அடிப்படையில், பொலிஸ் குழுவினர் அந்த வீட்டைச் சோதனையிட்டுள்ளனர்.
இதன்போது, மெத்தையின் கீழ் குவித்து வைக்கப்பட்டிருந்த 12 பதிவுத் தபால் கடிதங்களும் சாதாரண தபாலுக்குச் சொந்தமான கடிதங்களும் கண்டுபிடிக்கப்பட்டுள்ளன. மொத்தமாக 2,078 கடிதங்கள் மீட்கப்பட்டுள்ளதாகத் தெரிவிக்கப்படுகிறது.
சந்தேகநபரிடம் மேற்கொள்ளப்பட்ட விசாரணைகளின்போது, ஆறு ஆண்டுகளுக்கும் மேலாகக் கடிதங்களை விநியோகிக்காமல் அவற்றை வீட்டில் மெத்தையின் கீழ் மறைத்து வைத்திருந்தமை தெரியவந்துள்ளதாகப் பொலிஸார் தெரிவித்துள்ளனர்.
