யாழ்ப்பாணம் மற்றும் கிளிநொச்சி மாவட்டங்களில் புதிதாக மதுபான விற்பனை நிலையங்களைத் திறப்பதற்கு கடும் எதிர்ப்புத் தெரிவித்துள்ள இலங்கைத் தமிழரசுக் கட்சியின் நாடாளுமன்றக் குழுத் தலைவரும் நாடாளுமன்ற உறுப்பினருமான சாணக்கியன் இராசமாணிக்கம், வட மாகாணத்தின் அபிவிருத்திக்கும் மக்களின் நலனுக்கும் அரசாங்கம் முன்னுரிமை வழங்க வேண்டும் எனக் கோரியுள்ளார்.
இன்று நாடாளுமன்றத்தில் நிலையியற் கட்டளை 27(2)-இன் கீழ் கேள்வியொன்றை எழுப்பிய அவர், குறித்த இரண்டு மாவட்டங்களிலும் புதிதாக மதுபான விற்பனை நிலையங்களைத் திறப்பதற்கான முன்மொழிவுகளுக்கு மக்கள் மத்தியில் கடும் எதிர்ப்பு காணப்படுவதாகத் தெரிவித்தார்.
குறிப்பாக, இந்த விற்பனை நிலையங்களைப் பாடசாலைகள், கோவில்கள் மற்றும் குடியிருப்புப் பகுதிகளுக்கு அருகில் அமைப்பதற்கான முன்மொழிவுகள் குறித்து அவர் கவலை வெளியிட்டார்.
வட மாகாணத்தின் அபிவிருத்தி என்பது மதுபான விற்பனை நிலையங்களின் எண்ணிக்கையை அதிகரிப்பதல்ல என்றும், மக்களின் வாழ்வாதாரம், பொதுச் சேவைகள் மற்றும் பொருளாதார வாய்ப்புகளை மேம்படுத்துவதே உண்மையான அபிவிருத்தியாக இருக்க வேண்டும் என்றும் அவர் வலியுறுத்தினார்.
முன்னாள் ஜனாதிபதி ரணில் விக்கிரமசிங்கவின் ஆட்சிக் காலத்தில் வழங்கப்பட்டதாகக் கூறப்படும் 361 மதுபான அனுமதிப்பத்திரங்கள் தொடர்பாகவும் இராசமாணிக்கம் கேள்வி எழுப்பினார். அவற்றை வழங்குவதற்குப் பரிந்துரைத்த அரசியல்வாதிகளின் பெயர்கள், பயனாளர்களின் விபரங்கள், முறைகேடுகள் தொடர்பான விசாரணைகளின் முடிவுகள் மற்றும் பின்னர் இரத்துச் செய்யப்பட்ட அனுமதிப்பத்திரங்களின் எண்ணிக்கை ஆகியவற்றை பகிரங்கப்படுத்துமாறும் அவர் கோரினார்.
மட்டக்களப்பு பகுதியில் சட்டவிரோத மதுபான உற்பத்தியும் விற்பனையும் வேகமாக அதிகரித்து வருவது குறித்தும் கருத்துத் தெரிவித்த அவர், மீண்டும் மீண்டும் குற்றங்களில் ஈடுபடுவோருக்கு எதிராகக் கடுமையான சட்ட நடவடிக்கைகளை மேற்கொண்டு தண்டனைகளை அதிகரிக்க வேண்டும் எனக் கேட்டுக்கொண்டார்.
சட்டபூர்வமான மதுபானங்களுக்கு அதிக வரி விதிக்கப்படுவதால், நுகர்வோர் குறைந்த விலையில் கிடைக்கும் சட்டவிரோத மதுபானங்களை நாடுகின்றனரா என்றும், இதனால் மதுபானம் தொடர்பான சுகாதார அபாயங்கள் அதிகரித்து, இலவச பொதுச் சுகாதார சேவைகள் மீது மேலதிக சுமை ஏற்படுகிறதா என்றும் அவர் கேள்வி எழுப்பினார்.
2025 மற்றும் 2026ஆம் ஆண்டுகளில் சட்டவிரோத மதுபானம் தொடர்பான குற்றங்கள் மற்றும் மீண்டும் மீண்டும் குற்றங்களில் ஈடுபட்டவர்கள் குறித்த மாவட்ட ரீதியான புள்ளிவிபரங்களை வழங்குமாறும் அவர் கோரினார். மேலும், 2024 செப்டெம்பர் மாதம் முதல் யாழ்ப்பாணம் மற்றும் கிளிநொச்சி மாவட்டங்களில் முன்மொழியப்பட்ட, அங்கீகரிக்கப்பட்ட அல்லது வழங்கப்பட்ட மதுபான அனுமதிப்பத்திரங்கள் தொடர்பான விபரங்களையும் வெளியிடுமாறு கேட்டுக்கொண்டார்.
மதுபான அனுமதிப்பத்திரங்களை வழங்குவதில் வெளிப்படைத்தன்மையை உறுதிப்படுத்துதல், மக்களின் எதிர்ப்புகளுக்குச் செவிசாய்த்தல் மற்றும் சட்டவிரோத மதுபான உற்பத்தி, விற்பனையைக் கட்டுப்படுத்தும் நடவடிக்கைகளை வலுப்படுத்துதல் ஆகியவற்றின் அவசியத்தையும் அவர் வலியுறுத்தினார்.
இதற்குப் பதிலளித்த பொருளாதார அபிவிருத்திப் பிரதி அமைச்சர் நிஷாந்த ஜயவீர, குற்றவாளிகளுக்கு விதிக்கப்படும் தண்டனைகளை அதிகரிப்பதற்காக மதுவரிக் கட்டளைச் சட்டத்தைத் திருத்துவதற்கான வரைவு தயாரிக்கப்பட்டுள்ளதாகவும், அதற்கான சட்ட நடவடிக்கைகள் ஆரம்பிக்கப்பட்டுள்ளதாகவும் தெரிவித்தார்.
தற்போதைய மதுவரிக் கட்டளைச் சட்டத்தில் காணப்படும் குறைபாடுகள் அடையாளம் காணப்பட்டு திருத்தப்பட்டுள்ளதாகவும், எதிர்காலத்தில் தேவையான சட்டத் திருத்தங்களை உள்ளடக்கி, அவற்றுக்கு விரைவில் ஒப்புதல் கிடைக்கும் என எதிர்பார்ப்பதாகவும் பிரதி அமைச்சர் மேலும் குறிப்பிட்டார்.
