ஸ்ரீலங்கன் விமான சேவையின் தகவல் தொழில்நுட்ப (IT) அமைப்புகள் ஹேக்கர்களின் கட்டுப்பாட்டுக்குள் கொண்டுவரப்பட்டுள்ளதாக வெளியாகும் ஊடகச் செய்திகள் மற்றும் கருத்துகளை அந்த விமான சேவை நிறுவனம் வன்மையாக மறுத்துள்ளது.
வெளியிட்டுள்ள அறிக்கையில், 2026 ஜூன் 29ஆம் திகதி வெளித்தரப்பினரால் மேற்கொள்ளப்பட்டதாகக் கூறப்படும் சைபர் தாக்குதல் தொடர்பாக வெளியான செய்தியை அடிப்படையாகக் கொண்டே இந்தக் குற்றச்சாட்டுகள் முன்வைக்கப்படுவதாக ஸ்ரீலங்கன் விமான சேவை தெரிவித்துள்ளது.
குறித்த செய்தி தொடர்பில் அறிந்தவுடன் உடனடிப் பரிசோதனைகள், தொழில்நுட்ப மதிப்பீடுகள் மற்றும் முன்னெச்சரிக்கை நடவடிக்கைகள் மேற்கொள்ளப்பட்டதாகவும் நிறுவனம் குறிப்பிட்டுள்ளது.
இந்தப் பரிசோதனைகளின் முடிவுகளின்படி, நிறுவனத்தின் உள் தகவல் தொழில்நுட்ப அமைப்புகள் அல்லது செயல்பாட்டு அமைப்புகளுக்குள் அனுமதியற்ற அணுகல் இடம்பெறவில்லை என்றும், தரவுகள் திருடப்படவில்லை என்றும், சேவைகளுக்கு இடையூறு ஏற்படவில்லை என்றும் உறுதிப்படுத்தப்பட்டுள்ளதாக அறிக்கையில் தெரிவிக்கப்பட்டுள்ளது.
மின்னஞ்சல் உள்ளிட்ட நிறுவனத்தின் அனைத்து அமைப்புகளும் சேவைகளும் தடையின்றித் தொடர்ந்து இயங்குவதாகவும், விமான சேவையின் செயல்பாடுகளுக்கு எந்தவித பாதிப்பும் ஏற்படவில்லை என்றும் நிறுவனம் மேலும் தெரிவித்துள்ளது.
மேலும், சம்பந்தப்பட்ட தரப்பினரால் பிட்கொயின், அமெரிக்க டொலர்கள் அல்லது வேறு எந்த வடிவத்திலும் கப்பம் கோரப்படவில்லை என்றும், கப்பம் செலுத்துவது தொடர்பாக எந்தவித பேச்சுவார்த்தையும் இடம்பெறவில்லை என்றும் ஸ்ரீலங்கன் விமான சேவை உறுதிப்படுத்தியுள்ளது.
எனவே, தமது தகவல் தொழில்நுட்ப அமைப்புகள் ஹேக்கர்களின் கட்டுப்பாட்டில் இருப்பதாக முன்வைக்கப்படும் குற்றச்சாட்டுகளை நிறுவனம் முற்றாக நிராகரித்துள்ளது.
பயணிகள், ஊழியர்கள் மற்றும் வணிகப் பங்காளர்களுக்கு நம்பகமான சேவையைத் தொடர்ந்து வழங்குவதற்காக, தமது தகவல் அமைப்புகளின் பாதுகாப்பை உறுதிப்படுத்துவதில் தொடர்ந்து அர்ப்பணிப்புடன் செயற்படுவதாகவும் நிறுவனம் வலியுறுத்தியுள்ளது.
இதற்கிடையில், ஸ்ரீலங்கன் விமான சேவையின் தகவல் தொழில்நுட்ப அமைப்புகள் ஹேக்கர்களின் கட்டுப்பாட்டுக்குள் கொண்டுவரப்பட்டுள்ளதாகக் கூறும் செய்தியை ஐக்கிய மக்கள் சக்தியின் நாடாளுமன்ற உறுப்பினர் தயாசிறி ஜயசேகர பகிரங்கப்படுத்தியிருந்தார்.
