2015 முதல் 2025 ஆம் ஆண்டு வரையிலான காலப்பகுதியில் தேசிய சிறுவர் பாதுகாப்பு அதிகாரசபைக்கு குழந்தைகள் மீதான துஷ்பிரயோகம் தொடர்பாக 108,581 முறைப்பாடுகள் கிடைத்துள்ளதாக மகளிர் மற்றும் சிறுவர் அலுவல்கள் அமைச்சர் சரோஜா சாவித்ரி போல்ராஜ் நாடாளுமன்றத்தில் தெரிவித்தார்.
எதிர்க்கட்சித் தலைவர் சஜித் பிரேமதாச முன்வைத்த கேள்விக்கு பதிலளித்த அமைச்சர், 2026 ஏப்ரல் 30 ஆம் தேதி நிலவரப்படி குழந்தை துஷ்பிரயோகம் தொடர்பான 4,421 வழக்குகள் உயர்நீதிமன்றங்களில் விசாரணையில் உள்ளதாக தெரிவித்தார்.
இந்த வழக்குகளை விரைவாக முடிக்க பொலிஸாரின் சிறுவர் மற்றும் மகளிர் பாதுகாப்புப் பிரிவுகள், 47 சிறுவர் மற்றும் மகளிர் பாதுகாப்பு பணியகங்கள் மற்றும் தேசிய சிறுவர் பாதுகாப்பு அதிகாரசபை இணைந்து செயல்பட்டு வருவதாகவும் அவர் குறிப்பிட்டார்.
பாதிக்கப்பட்ட குழந்தைகள் நீதிமன்றத்தில் நேரில் ஆஜராக வேண்டிய அவசியத்தை குறைக்கும் வகையில், பாதுகாப்பான சூழலில் காணொளி மூலம் சாட்சியங்களை பதிவு செய்து அவற்றை நீதிமன்ற சான்றாக பயன்படுத்தும் திட்டமும் முன்னெடுக்கப்பட்டு வருகிறது. இதற்காக ஒன்பது மாகாணங்களிலும் காணொளி சாட்சி பதிவு மையங்களை அமைப்பதற்கான நடவடிக்கைகள் மேற்கொள்ளப்பட்டு வருகின்றன.
இதற்கிடையில், 2026 ஜனவரி 1 முதல் ஜூன் 30 வரை குழந்தைகள் தொடர்பான 5,523 முறைப்பாடுகள் தேசிய சிறுவர் பாதுகாப்பு அதிகாரசபைக்கு கிடைத்துள்ளன.
அவற்றில் குழந்தைகள் மீதான கொடுமைகள், பாலியல் துஷ்பிரயோகம், கடத்தல், வணிக ரீதியிலான பாலியல் சுரண்டல், சிறுவர் தொழில், இளவயது கர்ப்பம், குழந்தை திருமணம், இணையவழி வன்முறை மற்றும் தற்கொலை முயற்சிகள் தொடர்பான முறைப்பாடுகள் அடங்குகின்றன.
இந்தப் புள்ளிவிவரங்கள் குழந்தைகள் பாதுகாப்பு அமைப்புகளை மேலும் வலுப்படுத்துவதன் அவசியத்தையும், குற்றவாளிகளுக்கு எதிராக துரிதமான சட்ட நடவடிக்கைகள் எடுக்க வேண்டிய தேவையையும் எடுத்துக்காட்டுவதாக தேசிய சிறுவர் பாதுகாப்பு அதிகாரசபை தெரிவித்துள்ளது.
