எதிர்வரும் 12ஆம் திகதி அனுராதபுரத்தில் நடைபெறவுள்ள ஸ்ரீ லங்கா பொதுஜன பெரமுனவின் பேரணிக்காக நகரிலுள்ள பிரதான இரண்டு விளையாட்டு மைதானங்களையும் வழங்க அனுராதபுர மாநகர சபை மறுத்துள்ளது.
வலிசிங்க ஹரிச்சந்திர விளையாட்டரங்கம் மற்றும் சல்காது மாநகர சபை விளையாட்டரங்கம் என்பன அந்த நாட்களில் ஏனைய தரப்பினரால் முன்பதிவு செய்யப்பட்டுள்ளதால் அவற்றை வழங்க முடியாது என அனுராதபுர நகர ஆணையாளர் அறிவித்துள்ளார்.
பேரணிக்காக பொருத்தமான வேறு ஒரு திகதியை ஒதுக்கிக் கொள்ள நடவடிக்கை எடுக்குமாறும் மாநகர சபை பொதுஜன பெரமுன அமைப்பாளர்களுக்கு அறிவித்துள்ளது.
எனினும், இந்தத் தீர்மானத்திற்கு எதிராக ஸ்ரீ லங்கா பொதுஜன பெரமுன பிரதிநிதிகள் கடும் எதிர்ப்பை வெளியிட்டுள்ளனர்.
சல்காது மைதானத்திற்காக தாம் முன்னரே விண்ணப்பித்திருந்த போதிலும், பின்னர் விண்ணப்பித்த வேறு தரப்புக்கு அது வழங்கப்பட்டுள்ளதாக அவர்கள் குற்றஞ்சாட்டுகின்றனர். வலிசிங்க ஹரிச்சந்திர விளையாட்டரங்கமும் மூன்றாவது தரப்புக்கு ஒதுக்கப்பட்டுள்ளதாகக் கூறி, தமக்கு மைதானங்களை வழங்குவது அநியாயமாக மறுக்கப்பட்டுள்ளதாகவும் அவர்கள் தெரிவிக்கின்றனர்.
இந்த நடவடிக்கை தேசிய மக்கள் சக்தியை பிரதிநிதித்துவப்படுத்தும் மேயரின் ஆலோசனையின் பேரில் மேற்கொள்ளப்பட்ட அரசியல் பழிவாங்கல் எனவும் பொதுஜன பெரமுன பிரதிநிதிகள் மேலும் குற்றஞ்சாட்டுகின்றனர்.
