பாராளுமன்றம் ஒக்டோபர் 06 முதல் 09 ஆம் திகதி வரை கூடவுள்ளதாக பாராளுமன்றத்தின் செயலாளர் நாயகம் குஷானி ரோஹணதீர தெரிவித்துள்ளார். குறித்த பாராளுமன்ற வாரத்திற்கான பணிகள், சபாநாயகர் டாக்டர் ஜகத் விக்கிரமரத்ன தலைமையில் அண்மையில் நடைபெற்ற பாராளுமன்ற அலுவல்கள் பற்றிய குழுக் கூட்டத்தில் தீர்மானிக்கப்பட்டுள்ளன.
ஒக்டோபர் 06 செவ்வாய்க்கிழமை, காலை 9.30 மணி முதல் 10.00 மணி வரை நிலையியற் கட்டளை 22(1) முதல் 22(6) வரையிலான பாராளுமன்ற அலுவல்களுக்காக நேரம் ஒதுக்கப்பட்டுள்ளது. காலை 10.00 மணி முதல் 11.00 மணி வரை வாய்மூல விடைகளை எதிர்பார்க்கும் கேள்விகளுக்கும், காலை 11.00 மணி முதல் 11.30 மணி வரை நிலையியற் கட்டளை 27(2) இன் கீழான கேள்விகளுக்கும் நேரம் ஒதுக்கப்பட்டுள்ளது.
அதனைத் தொடர்ந்து, காலை 11.30 மணி முதல் மாலை 5.00 மணி வரை அந்நியச் செலாவணி சட்டத்தின் கீழ் வெளியிடப்பட்டுள்ள இரண்டு ஒழுங்குவிதிகள் மற்றும் ஒரு கட்டளை, அத்துடன் அரச கடன் முகாமைத்துவச் சட்டத்தின் கீழான தீர்மானம் தொடர்பில் விவாதம் நடத்தப்படவுள்ளது. மாலை 5.00 மணி முதல் 5.30 மணி வரை சபை ஒத்திவைப்பு நேரக் கேள்விகளுக்காக நேரம் ஒதுக்கப்பட்டுள்ளது.
ஒக்டோபர் 07 புதன்கிழமை, காலை 10.00 மணி முதல் 10.30 மணி வரை பிரதமரிடம் கேட்கப்படும் கேள்விகளுக்கும், காலை 10.30 மணி முதல் 11.00 மணி வரை வாய்மூல விடைகளை எதிர்பார்க்கும் கேள்விகளுக்கும் நேரம் ஒதுக்கப்பட்டுள்ளது. காலை 11.30 மணி முதல் மாலை 5.30 மணி வரை எதிர்க்கட்சியினால் முன்வைக்கப்படும் சபை ஒத்திவைப்பு பிரேரணை தொடர்பில் விவாதம் நடத்தப்படவுள்ளது.
ஒக்டோபர் 08 வியாழக்கிழமை, காலை 11.30 மணி முதல் மாலை 5.00 மணி வரை ஊழல் எதிர்ப்பு (திருத்தம்) சட்டமூலத்தின் இரண்டாம் வாசிப்பு மீதான விவாதம் நடைபெறவுள்ளது. மாலை 5.00 மணி முதல் 5.30 மணி வரை சபை ஒத்திவைப்பு நேரக் கேள்விகளுக்காக நேரம் ஒதுக்கப்பட்டுள்ளது.
ஒக்டோபர் 09 வெள்ளிக்கிழமை, காலை 11.30 மணி முதல் மாலை 5.00 மணி வரை தனிப்பட்ட பாராளுமன்ற உறுப்பினர்களின் பல்வேறு பிரேரணைகள் விவாதிக்கப்படவுள்ளன. தியகம வனப்பகுதியைப் பாதுகாத்தல், புத்தளம் ரயில் பாதையில் ரயில் சேவைகளை அதிகரித்தல், 1983 ஆம் ஆண்டு இடம்பெற்ற கறுப்பு ஜூலை இன வன்முறைகள் தொடர்பில் உண்மையைக் கண்டறிவதற்கான ஜனாதிபதி விசாரணை ஆணைக்குழுவை நியமித்தல், வீதி ஒதுக்கீடுகளில் மரங்களை நடுதல் மற்றும் பராமரிப்பதற்கான முறையான நடைமுறையை உருவாக்குதல் உள்ளிட்ட பல்வேறு விடயங்கள் இதில் அடங்குகின்றன.
