එච්.අයි.වී. (HIV) සහ අනෙකුත් ලිංගිකව සම්ප්රේෂණය වන ආසාදන (STIs) වැළැක්වීම සඳහා කොන්ඩම් නිවැරදිව හා අඛණ්ඩව භාවිත කරන ලෙස සෞඛ්ය බලධාරීන් මහජනතාවගෙන් ඉල්ලා සිටින අතර, ප්රමිතියෙන් තොර බාල කොන්ඩම් භාවිතයෙන් වළකින ලෙසද අනතුරු අඟවා තිබේ.
එච්.අයි.වී. පරීක්ෂණ පුළුල් කිරීම සහ වැළැක්වීමේ සේවාවන් සඳහා ප්රවේශය වැඩිදියුණු කිරීම වෙනුවෙන් ජාතික ලිංගාශ්රිත රෝග සහ ඒඩ්ස් මර්දන ව්යාපාරය (NSACP) ක්රියාත්මක කරන වැඩසටහන් අතරතුර මෙම දැනුම්දීම සිදුකර ඇත.
එම උත්සාහයන්ගේ කොටසක් ලෙස, HIV ස්වයං පරීක්ෂණ, උසස් තත්ත්වයේ කොන්ඩම් සහ ලුබ්රිකන්ට් ඉතා රහස්ය ලෙස ලබාගැනීම ඇතුළු HIV වැළැක්වීමේ හා පරීක්ෂණ සේවාවන් වෙත යොමුවීම සඳහා ‘KNOW4SURE.LK’ මාර්ගගත පද්ධතිය භාවිත කරන ලෙස NSACP ජනතාව දිරිමත් කරයි.
සායන වෙත යෑමට මැලිවන පුද්ගලයන්ට මෙම ඩිජිටල් පද්ධතිය හරහා පහසුවෙන් සහ රහස්යභාවය සුරකිමින් HIV ආශ්රිත සේවාවන් ලබාගත හැකි බව ජාතික ලිංගාශ්රිත රෝග සහ ඒඩ්ස් මර්දන ව්යාපාරයේ විශේෂඥ වෛද්ය විනෝ ධර්මකුලසිංහ ‘ඩේලි මිරර්’ පුවත්පතට පවසා තිබේ.
මෙම වෙබ් අඩවිය ඔස්සේ පරිශීලකයන්ට තමන්ට ඇති HIV හෝ ලිංගිකව සම්ප්රේෂණය වන ආසාදන අවදානම ස්වයංව තක්සේරු කිරීමට, HIV ස්වයං පරීක්ෂණ සේවාවන් වෙත යොමුවීමට, ආසන්නතම පරීක්ෂණ මධ්යස්ථාන හඳුනාගැනීමට සහ HIV පරීක්ෂණ සඳහා වේලාවන් වෙන්කර ගැනීමට හැකියාව පවතී.
“තමන්ගේ රහස්යභාවය ආරක්ෂා කරගනිමින් HIV අවදානම දැනගැනීමටත් පරීක්ෂණ සේවාවන් වෙත යොමුවීමටත් මෙම පද්ධතිය භාවිත කළ හැකියි. HIV පරීක්ෂණ සංඛ්යාව ඉහළ නැංවීමට සහ ආසාදන මුල් අවදියේදීම හඳුනාගැනීමට වැඩි පිරිසක් මෙම සේවාව භාවිත කරනු ඇතැයි අපි බලාපොරොත්තු වෙනවා” යැයි වෛද්ය ධර්මකුලසිංහ පවසා ඇත.
එමෙන්ම කොන්ඩම්, ලුබ්රිකන්ට් සහ HIV පරීක්ෂණ කට්ටල ඇණවුම් කිරීමටද මෙම පද්ධතිය හරහා හැකියාව ඇති බැවින්, HIV වැළැක්වීම සහ පරීක්ෂා කිරීම සඳහා අවශ්ය නිෂ්පාදන රහස්යභාවය සහිතව ලබාගැනීමට අවස්ථාව සැලසේ.
ලිංගික එක්වීම්වලදී HIV සහ අනෙකුත් ලිංගිකව සම්ප්රේෂණය වන ආසාදනවලින් නිසි ආරක්ෂාව ලබාගැනීම සඳහා කොන්ඩම් නිවැරදිව හා අඛණ්ඩව භාවිත කළ යුතු බව සෞඛ්ය බලධාරීහු අවධාරණය කරති. විශ්වාසදායක මූලාශ්රවලින් පමණක් කොන්ඩම් ලබාගැනීමත්, ඒවායේ කාර්යක්ෂමතාවයට බලපෑම් කළ හැකි බාල නිෂ්පාදනවලින් වළකින ලෙසත් ඔවුහු පෙන්වා දෙති.
රජයේ සායනවලින් හෝ තෝරාගත් පෞද්ගලික වෛද්යවරුන් මගින් පරීක්ෂණ සේවාවන් වෙන්කර ගැනීමට ජනතාවට හැකියාව ඇත. රජයේ සායනවලදී HIV පරීක්ෂණ නොමිලේ සිදුකරනු ලබන අතර, පෞද්ගලික ආයතනවලදී ඒ සඳහා සුළු මුදලක් අයකළ හැක.
වර්තමානයේ අධි අවදානම් සහ අවදානමට ලක්විය හැකි බොහෝ පිරිස් සමාජ මාධ්ය සහ ඩේටිං යෙදුම් හරහා සහකරුවන් හඳුනාගත්තද, ඔවුන් සාම්ප්රදායික HIV වැළැක්වීමේ, පරීක්ෂණ හෝ ප්රතිකාර සේවාවන් සමඟ සම්බන්ධ නොවීමේ ප්රවණතාවක් පවතින බැවින් මෙම මාර්ගගත පද්ධතිය ඉතා වැදගත් වන බව වෛද්ය ධර්මකුලසිංහ වැඩිදුරටත් සඳහන් කර ඇත.
