ඔස්ට්රේලියාවේ ක්වීන්ස්ලන්ඩ් විශ්වවිද්යාලයේ සහ නිව් සවුත් වේල්ස් විශ්වවිද්යාලයේ විද්යාඥයන් සෙවීම් හා ගලවාගැනීම් මෙහෙයුම් සඳහා භාවිත කළ හැකි ‘සයිබෝග්’ කැරපොත්තන් නිර්මාණය කර තිබේ.
‘පැරබෝර්ග්ස්’ ලෙස හැඳින්වෙන මෙම කැරපොත්තන්, කඩා වැටුණු ගොඩනැගිලි සහ පටු ස්ථානවල සිරවී සිටින පුද්ගලයන් සෙවීමට මෙන්ම හදිසි ඖෂධ රැගෙන යාමටද භාවිත කළ හැකි බව පර්යේෂකයෝ පවසති.
උතුරු ක්වීන්ස්ලන්ඩ් ප්රදේශයේ භූමිය තුළ ජීවත් වන විශාල කැරපොත්තන් මෙම පර්යේෂණය සඳහා යොදාගෙන තිබේ. සෙන්ටිමීටර් 8.5ක් පමණ දක්වා වර්ධනය විය හැකි මෙම කැරපොත්තන් ලොව විශාලතම බරැති කැරපොත්තා විශේෂයක් ලෙස සැලකේ.
එක් එක් කැරපොත්තාගේ පිටුපස කැමරාවක් හෝ ඖෂධ එන්නත් කිරීම සඳහා වන ඉඳිකටුවක් වැනි උපකරණ ඇතුළත් කුඩා උපකරණයක් සවි කර තිබේ. එමෙන්ම, එහි ශරීරයට සවි කරන ලද කුඩා ඉලෙක්ට්රෝඩ මඟින් ස්නායු පද්ධතිය වෙත විද්යුත් සංඥා යැවිය හැකි අතර, එමඟින් දුරස්ථව සිට ඒවායේ චලනය පාලනය කළ හැකිය.
මෙම තාක්ෂණය මඟින් රෝගියෙකු වෙත ළඟා වූ පසු කැරපොත්තාට සවි කර ඇති උපකරණයක් හරහා ඖෂධ එන්නත් කිරීමට හැකියාව පවතී.
පර්යේෂණයට දායක වූ ජෛව රොබෝ තාක්ෂණ ඉංජිනේරු තෑන් වෝ-ඩෝවන් සඳහන් කළේ, ක්රියාවලිය ආරම්භ කිරීමට පෙර කෘමීන් නිර්වින්දනය කර, එම ක්රියාවලියේදී ඔවුන්ට කිසිදු වේදනාවක් නොදැනෙන බව සහතික කිරීමට ඔවුන්ගේ චලනය සීමා කරන බවයි.
පටු ස්ථානවලට ඇතුළු වීමටත්, දුෂ්කර භූමි හරහා ගමන් කිරීමටත්, දැඩි පරිසර තත්ත්වයන් යටතේ ජීවත් වීමටත් කැරපොත්තන්ට හැකි බැවින් මෙම පර්යේෂණය සඳහා ඒවා තෝරාගෙන තිබේ. සාමාන්ය රොබෝවරුන්ට වඩා ඒවාට අවශ්ය බලශක්ති ප්රමාණයද ඉතා අඩුය.
මිනිසුන්ට ඖෂධ එන්නත් කිරීමේ ක්රමය මෙතෙක් පරීක්ෂා කර නොමැත. කෙසේ වෙතත්, පාලිත රසායනාගාර පරිසරයක් තුළ සිලිකන් ඉලක්ක සහ ඌරු සම භාවිත කරමින් පරීක්ෂණ සිදු කර තිබේ.
රසායනාගාර පරීක්ෂණවලදී එක් ‘Observer’ කැරපොත්තා කැමරාවක් භාවිත කරමින් ඉලක්කයක් හඳුනාගෙන ඇති අතර, තවත් කැරපොත්තෙකු දුරස්ථ මඟපෙන්වීමක් යටතේ එන්නත් උපකරණය භාවිත කර ඖෂධයක් එන්නත් කර තිබේ.
ඖෂධ එන්නත් කිරීමේ උත්සාහයන්ගෙන් සමස්තයක් ලෙස සියයට 72ක් සාර්ථක වී ඇත. ඉලක්කයෙන් සෙන්ටිමීටර් 15ක දුරක සිට එන්නත් කළ අවස්ථාවලදී සාර්ථකත්ව අනුපාතය සියයට 95 දක්වා ඉහළ ගොස් තිබේ.
අනාගතයේදී කඩා වැටුණු ගොඩනැගිලි හෝ ගුහා තුළ සිරවී සිටින පුද්ගලයන් වෙත ළඟා වීමට මෙම ‘පැරබෝර්ග්’ කැරපොත්තන් භාවිත කළ හැකි බව පර්යේෂකයෝ පවසති.
මිනිස් ගලවාගැනීමේ කණ්ඩායම් ළඟා වීමට පෙර දැඩි අසාත්මිකතා හෝ සර්ප දෂ්ටන වැනි හදිසි අවස්ථා සඳහා අවශ්ය ඖෂධ විපතට පත් පුද්ගලයන් වෙත රැගෙන යාමටද ඒවාට හැකි වනු ඇතැයි විශ්වාස කෙරේ.
කෙසේ වෙතත්, සංඥා අවහිර වීම, අනතුරුදායක භූමි ප්රදේශ සහ එන්නත් ආරක්ෂිතව සිදු කිරීම සහතික කිරීම වැනි අභියෝගවලට විසඳුම් සෙවීමට තවදුරටත් පර්යේෂණ අවශ්ය වේ.
අවසානයේදී, ආපදා ප්රදේශ වෙත ‘පැරබෝර්ග්’ කැරපොත්තන් කණ්ඩායම් යැවීමට විද්යාඥයන් සැලසුම් කර තිබේ. ඒවායින් සමහරක් දිවි ගලවාගත් පුද්ගලයන් සෙවීමටත්, අනෙක් ඒවා හදිසි ඖෂධ රැගෙන යාමටත් භාවිත කිරීමට නියමිතය.
මූලාශ්රය: BBC සඳහා Collective Newsroom
ඡායාරූප: The University of Queensland & Reuters
