තමිල්නාඩු වෙට්රි කසාගම් පක්ෂයේ නායක සහ හිටපු ප්රමුඛ නළු විජයගේ බිරිඳ වන සංගීතා, දික්කසාදය ඉල්ලා ගොනු කර තිබූ පෙත්සම ඉල්ලා අස්කරගෙන ඇති බවට වාර්තා පළ වී තිබේ.
විජය දේශපාලනයට පිවිසීමත් සමඟ ඔහුගේ පවුල් ජීවිතය සම්බන්ධයෙන් විවිධ විවේචන එල්ල වී තිබූ බව වාර්තා වේ. මේ අතර, දික්කසාද පෙත්සම ඉල්ලා අස්කරගෙන ඇති බවට පළ වන තොරතුර විජයගේ රසිකයන් සහ තමිල්නාඩු වෙට්රි කසාගම් පක්ෂයේ ආධාරකරුවන් අතර සතුටට හේතු වී ඇති බව සඳහන් වේ.
තමිල්නාඩුවේ කාවේරි ගැටලුව, මැතිවරණ කොට්ඨාස සීමා නැවත නිර්ණය කිරීම සහ ප්රාන්ත සභාවේ අයවැය සැසිවාරය ඇතුළු දේශපාලන කරුණු රැසකට විජය මුහුණ දෙමින් සිටින අවස්ථාවක, දික්කසාද පෙත්සම ඉල්ලා අස්කර ගැනීම පිළිබඳ පුවත ඔහුගේ පෞද්ගලික පවුල් ජීවිතය සම්බන්ධයෙන් එල්ල වූ විවේචන අවසන් කිරීමට හේතු වනු ඇති බව ජ්යෙෂ්ඨ මාධ්යවේදී වෙන්කටේෂන් පවසා තිබේ.
ඔහු මේ බව ‘මීඩියා සර්කල්’ යූටියුබ් නාලිකාවට ලබාදුන් සම්මුඛ සාකච්ඡාවකදී සඳහන් කර ඇත.
විජයගේ පුත් ජේසන් සංජේ මීට පෙර ලබාදුන් සම්මුඛ සාකච්ඡාවකදී තම පියාගේ සාර්ථකත්වය හේතුවෙන් පවුලේ සාමාජිකයන්ට වැඩි වගකීමක් පැවරී ඇති බව සඳහන් කළ බවද වෙන්කටේෂන් පවසා තිබේ. එම අදහසට විජයගේ බිරිඳ සංගීතා සහ දියණිය දිව්යා ද ඇතුළත් වන බව ඔහු සඳහන් කර ඇත.
විජය දේශපාලනයට පිවිසීමෙන් පසු පවුල කෙරෙහි අවධානය යොමු නොකරන බවට ඔහුට එරෙහිව දැඩි විවේචන එල්ල වූ බවද ඔහු වැඩිදුරටත් පවසා තිබේ.
