සංවිධානාත්මක අපරාධ, මත්ද්‍රව්‍ය ජාවාරම සහ නීතිවිරෝධී වත්කම් අත්පත් කර ගැනීම හෙවත් මුදල් විශුද්ධිකරණය සම්බන්ධ චෝදනා මත ප්‍රමුඛ පෙළේ ජාතික මට්ටමේ ක්‍රිකට් ක්‍රීඩකයකුගේ 37 හැවිරිදි වැඩිමහල් සොහොයුරා අත්අඩංගුවට ගැනීමට පොලිස් මත්ද්‍රව්‍ය කාර්යාංශය සූදානම් වන බව විශ්වාස කටයුතු පොලිස් ආරංචි මාර්ග පවසයි.
ගල්කිස්ස ප්‍රදේශයේ පදිංචිකරුවකු වන සැකකරු, ශ්‍රී ලංකාවේ සහ විදේශයන්හි ක්‍රියාත්මක වන මහාපරිමාණ මත්ද්‍රව්‍ය ජාවාරම්කරුවන් සහ පාතාල නායකයන් රැසක් සමඟ සෘජු සබඳතා පවත්වා ඇති බවට චෝදනා එල්ල වී තිබේ.
මීට පෙර ප්‍රචණ්ඩකාරී අපරාධ සම්බන්ධයෙන් දෙවරක් සිරදඬුවම් විඳ ඇති ඔහු පසුව සංවිධානාත්මක අපරාධ සහ මත්ද්‍රව්‍ය ජාවාරමට සම්බන්ධ වී ඇති බවට තොරතුරු අනාවරණය වී ඇත.
පසුගිය අගෝස්තු 1 වැනිදා රත්මලාන ගුවන්තොටුපළ හන්දිය ආසන්නයේ කඳවල පාරේදී යතුරුපැදියකින් පැමිණි තුවක්කුකරුවන් දෙදෙනකු විසින් 57 හැවිරිදි ජාතුංග ප්‍රියන්ත නමැත්තා වෙඩි තබා ඝාතනය කිරීමේ සිද්ධියට ද මෙම සැකකරු ආධාර අනුබල ලබාදී ඇති බවට තොරතුරු අනාවරණය වී තිබේ.
හෙරොයින්, ‘අයිස්’, කුෂ් සහ හෂීස් වැනි මත්ද්‍රව්‍ය ප්‍රවාහනය සහ බෙදාහැරීම සඳහා සැකකරු ප්‍රදේශයේ පුද්ගලයන් යොදාගෙන ඇති බවටද පොලිස් විමර්ශනවලදී අනාවරණය වී ඇත.
එමෙන්ම, විදේශගත සහ දේශීය පාතාල ජාවාරම්කරුවන් කිහිපදෙනකුගේ මත්ද්‍රව්‍ය ජාල සමඟද ඔහු සම්බන්ධ වී ඇති බවට පොලිසිය තොරතුරු අනාවරණය කරගෙන තිබේ.
මත්ද්‍රව්‍ය ජාවාරමෙන් උපයාගත් මුදල් විශුද්ධිකරණය කිරීම සහ ඒවා සඟවා තැබීමේ ක්‍රියාවලියටද සැකකරු සම්බන්ධ වී ඇති බවට චෝදනා එල්ල වී ඇත. එමෙන්ම, අල්ලස් ලබාගෙන ඔහුට සහාය වූ බව කියන දූෂිත පොලිස් නිලධාරීන් කිහිපදෙනකු පිළිබඳවද තොරතුරු අනාවරණය වී ඇතැයි වාර්තා වේ.
රැස්කරගෙන ඇති සාක්ෂි තවදුරටත් තහවුරු කර ගැනීමෙන් අනතුරුව සැකකරු අත්අඩංගුවට ගැනීමට පොලිසිය කටයුතු කරමින් සිටින බව වාර්තා වේ.
