පසුගිය ආණ්ඩු සමයේ කැබිනට් අනුමැතිය යටතේ මහල් නිවාස සංකීර්ණයක් ඉදිකිරීම සඳහා කොළඹ 7 ප්‍රදේශයේ සිදු වූ බව කියන සැකකටයුතු ඉඩම් ගනුදෙනුවක් සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව පරීක්ෂණයක් ආරම්භ කර තිබේ.
එම ඉඩම මිලදී ගැනීම සඳහා පුද්ගලයන් දෙදෙනකු විසින් රුපියල් මිලියන 154ක බැංකු ණයක් ලබාගෙන තිබුණද, එවැනි මිලදී ගැනීමක් සිදු කිරීමට තරම් මූල්‍ය හැකියාවක් ඔවුන්ට නොතිබූ බව කොමිසමේ පරීක්ෂණවලදී අනාවරණය වී ඇති බව වාර්තා වේ.
අදාළ ණය මුදල ආපසු ගෙවීමට ඔවුන් අපොහොසත් වීමෙන් පසු බැංකුව විසින් ඉඩම වෙන්දේසි කර ඇති අතර, පසුව සමාගමක් පිහිටුවාගෙන සිටි දේශපාලනික වශයෙන් සබඳතා ඇති පුද්ගලයකු විසින් එම ඉඩම මිලදී ගෙන ඇති බව විමර්ශකයන් පවසති.
ආරම්භයේදී ඉඩම මිලදී ගත් පුද්ගලයන් දෙදෙනා විමර්ශකයන්ට පවසා ඇත්තේ තමන් සිදු කළේ අදාළ ලේඛනවලට අත්සන් තැබීම පමණක් බවයි.
පසුව මෙම ඉඩම රුපියල් මිලියන 940කට වෙනත් සමාගමකට අලෙවි කර ඇති අතර, එම ස්ථානයේ මහල් නිවාස සංකීර්ණයක් ඉදිකර තිබේ.
මේ අතර, එම මහල් නිවාස සංකීර්ණයේ දැනට පදිංචිව සිටින පුද්ගලයන්ගේ ලැයිස්තුවක් අල්ලස් කොමිසම විසින් ලබාගෙන ඇති බව ජ්‍යෙෂ්ඨ නිලධාරියකු සඳහන් කර ඇත.
