උතුරු පළාත් සංචාරක ව්‍යාපාරයේ නව පරිච්ඡේදයක් සනිටුහන් කරමින්, ශ්‍රී ලංකාව සහ ඉන්දියාව වෙන්කරන පෝක් සමුද්‍ර සන්ධියේ පිහිටි රාම සේතු (ආදම්ගේ පාලම) හා සම්බන්ධ වැලිපර අට නැරඹීම සඳහා සංචාරක බෝට්ටු සේවාවක් පසුගිය සතියේ තලෙයිමන්නාරමෙන් ආරම්භ කර තිබෙනවා.
මන්නාරම දිස්ත්‍රික්කයේ සංචාරක ව්‍යාපාරය තවදුරටත් ප්‍රවර්ධනය කිරීමේ අරමුණින් මහජනතාවට සහ සංචාරකයන්ට මෙම වැලිපර අට නැරඹීමට අවස්ථාව සලසමින් තලෙයිමන්නාරම සිට මෙම බෝට්ටු සේවාව ක්‍රියාත්මක කිරීමට කටයුතු කර තිබෙනවා.
මෙහි නියමු චාරිකාව පසුගිය සිකුරාදා පැවැති අතර, බෝට්ටු සේවාව සඳුදා (28) සිට නිල වශයෙන් ක්‍රියාත්මක වී තිබෙනවා.
නියමු චාරිකාව සඳහා උතුරු පළාත් ආණ්ඩුකාර එන්. වේදනායගන්, මන්නාරම දිස්ත්‍රික් ලේකම් කේ. කනකේස්වරන්, උතුරු පළාත් සංචාරක කාර්යාංශයේ සභාපති දොස්තර ජේ. විවේකානන්දන් සහ මන්නාරම නගර ප්‍රාදේශීය ලේකම් ඇතුළු පිරිසක් එක්ව සිටියා.
මෙම සංචාරයේදී කණ්ඩායම තලෙයිමන්නාරමේ සිට තුන්වැනි වැලිපරය දක්වා බෝට්ටුවෙන් ගොස් එම ස්ථානයට ගොඩබැස පරීක්ෂා කර තිබෙනවා.
වැලිපර පිහිටි ස්ථාන සහ ඒවායේ තත්ත්වය, සංචාරකයන් එම ස්ථාන වෙත ප්‍රවාහනය කිරීමේ හැකියාව මෙන්ම සංචාරක කටයුතු සඳහා අවශ්‍ය සූදානම සහ යටිතල පහසුකම් පිළිබඳවද මෙහිදී ඇගයීමට ලක් කර තිබෙනවා.
මෙම පියවර මගින් මන්නාරම දිස්ත්‍රික්කයේ සාගර සංචාරක ව්‍යාපාරයේ හැකියාවන් තවදුරටත් වර්ධනය වන අතර, සංචාරක ක්ෂේත්‍රය ඔස්සේ ප්‍රදේශයේ ජනතාවට නව රැකියා සහ ආදායම් මාර්ග උදාවනු ඇතැයි අපේක්ෂා කෙරෙනවා.
කෙසේ වෙතත්, යාපනයේ පිහිටි ඉන්දීය නියෝජ්‍ය මහකොමසාරිස් කාර්යාලයේ නිලධාරීන් මෙම අවස්ථාවට සහභාගී නොවීම ද කැපී පෙනුණා. පළාත් සභාවේ ඉහළ නිලධාරියෙකු සඳහන් කර ඇත්තේ ආරක්ෂක අමාත්‍යාංශයෙන් අවශ්‍ය අනුමැතිය ලබාගැනීමේදී ඇති වූ පරිපාලනමය ගැටලු ඊට හේතුව වූ බවයි.
තවත් ජ්‍යෙෂ්ඨ නිලධාරියෙකු ප්‍රශ්න කර ඇත්තේ මෙම බෝට්ටු සේවාව දේශීය ජනතාවට පමණක් සීමා වන්නේද, නැතහොත් මුහුදු සීමාවේ ඉන්දීය පසෙහි පිහිටි රාම සේතු හි අග්‍රය නැරඹීමට විදේශීය සංචාරකයන්ටද අවස්ථාව හිමිවන්නේද යන්න පිළිබඳවයි.
