ලබන 30 වැනිදා මහ බැංකුව මීළඟ මුදල් ප්රතිපත්ති තීරණය ප්රකාශයට පත් කිරීමට නියමිත අතර, එහිදී පොලී අනුපාත වෙනස් නොකර පවත්වාගෙන යනු ඇති බවට ෆස්ට් කැපිටල් මූල්ය පර්යේෂණ ආයතනය අනාවැකි පළ කරයි.
එම ආයතනය නිකුත් කළ පූර්ව විශ්ලේෂණයක දැක්වෙන්නේ, මහ බැංකුව සිය එක්දින ප්රතිපත්ති අනුපාතය සියයට 8.75 මට්ටමේම පවත්වාගෙන යාමට සියයට 60ක සම්භාවිතාවක් පවතින බවයි.
එමෙන්ම පොලී අනුපාතය පදනම් අංක 50කින් ඉහළ නැංවීමට සියයට 40ක සම්භාවිතාවක් පවතින බවද එහි සඳහන් වේ.
මැයි මාසයේදී සිදුකළ පදනම් අංක 100ක පොලී අනුපාත ඉහළ නැංවීම තවමත් ආර්ථිකයට බලපාමින් පැවතීම මෙම පුරෝකථනයට එක් හේතුවක් ලෙස ෆස්ට් කැපිටල් ආයතනය පෙන්වා දෙයි.
එමෙන්ම ලබන අඟහරුවාදා සිට ක්රියාත්මක වන නව සංචිත අවශ්යතා වෙනස්කම් මගින්, තවදුරටත් පොලී අනුපාත ඉහළ නැංවීමකින් තොරව බැංකු පද්ධතියේ අතිරික්ත ද්රවශීලතාව අවශෝෂණය කරගත හැකි බවද එම ආයතනය සඳහන් කරයි.
මහ බැංකුවේ සියයට 5ක ඉලක්කයට වඩා ඉහළින් අගෝස්තු මාසයේදී උද්ධමනය සියයට 8 දක්වා ඉහළ ගොස් තිබීම සහ ජූලි මාසයේදී මෙරට වෙළෙඳ හිඟය අමෙරිකානු ඩොලර් බිලියනයකට වඩා පුළුල් වීමද අවධානයට ලක්ව ඇති බව සඳහන් වේ.
කෙසේ වෙතත්, ඉහළ යන ගෝලීය තෙල් මිල සහ එල් නිනෝ බලපෑම හේතුවෙන් ඇතිවිය හැකි ආහාර මිල අවදානම්ද මහ බැංකුවේ තීරණයට බලපෑ හැකි සාධක ලෙස ෆස්ට් කැපිටල් ආයතනය පෙන්වා දෙයි.
