ලබන සැප්තැම්බර් 15 වනදා සිට ක්රියාත්මක වන පරිදි ශ්රී ලාංකික ගමන් බලපත්ර හිමියන්ට තායිලන්තයේ වීසා රහිතව ඇතුළුවීමේ සහනය තවදුරටත් හිමි නොවන බව වාර්තා වේ.
තායි රජය විසින් හඳුන්වා දී ඇති නව සංශෝධිත ඇතුළුවීමේ රෙගුලාසි යටතේ මෙම පියවර ගෙන ඇති බව සඳහන් වේ.
තායිලන්ත විදේශ කටයුතු අමාත්යාංශය සඳහන් කළේ, සංශෝධිත වීසා නිදහස් කිරීම් සහ පැමිණීමේදී ලබාදෙන වීසා සම්බන්ධ නව ක්රමවේද අගෝස්තු 31 වනදා එරට රාජ්ය ගැසට් පත්රයේ ප්රකාශයට පත් කර ඇති බවයි.
පසුගිය මැයි මාසයේදී තායිලන්ත කැබිනට් මණ්ඩලය විසින් අනුමත කරන ලද සමාලෝචනයකට අනුව මෙම වෙනස්කම් සිදුකර තිබේ.
ඒ අනුව, මීට පෙර පැවති දින 60ක වීසා රහිතව රැඳී සිටීමේ සහනය අහෝසි කර ඇති අතර, කෙටි කාලීන සංචාර සඳහා වීසා නොමැතිව ඇතුළු විය හැකි රටවල නාමලේඛනයද සංශෝධනය කර ඇත.
ජාතික ආරක්ෂාව, සංචාරක හා ආර්ථික අභිලාෂයන්, ද්විපාර්ශ්වික අන්යෝන්ය ප්රතිලාභ, අතිරේක වීසා සහන අවම කිරීම සහ තායිලන්තයේ ඉලෙක්ට්රොනික වීසා (e-Visa) පද්ධතියේ භාවිතය යන කරුණු සලකා බලමින් තායි රජය මෙම තීරණයට එළඹ තිබේ.
නව රෙගුලාසිවලට අනුව, සැප්තැම්බර් 15 වනදායින් පසුව තායිලන්තය බලා පිටත්ව යන ශ්රී ලාංකිකයන් ගමනට පෙර සුදුසු වීසාවක් ලබා ගැනීම අනිවාර්ය වේ.
ඒ සඳහා තායිලන්තයේ මාර්ගගත e-Visa පද්ධතිය හරහා වීසා අයදුම්පත් ඉදිරිපත් කළ හැකිය. කොළඹ පිහිටි රාජකීය තායි තානාපති කාර්යාලයද සැප්තැම්බර් 4 වනදා නිකුත් කළ නිවේදනයක් මගින් මෙම නව වීසා ක්රමවේදය පිළිබඳව දැනුවත් කර තිබේ.
කෙසේ වෙතත්, පවතින වීසා සහන ක්රමය යටතේ සැප්තැම්බර් 15 වනදාට පෙර තායිලන්තයට ඇතුළු වන ශ්රී ලාංකික සංචාරකයින්ට, තායි ආගමන විගමන බලධාරීන් විසින් අවසර ලබාදී ඇති කාලසීමාව අවසන් වන තෙක් එරට රැඳී සිටීමට අවස්ථාව හිමිවන බව වාර්තා වේ.
