ශ්රී ලංකාවේ දීර්ඝ කාලීන බලාපොරොත්තුවක් වූ විදුලි දුම්රිය මාර්ග පද්ධතියේ ඉදිකිරීම් කටයුතු ලබන වසරේ මැයි හෝ ජූනි මාසය වන විට ආරම්භ කිරීමට අපේක්ෂා කරන බව ප්රවාහන, මහාමාර්ග සහ නාගරික සංවර්ධන අමාත්ය බිමල් රත්නායක මහතා පවසයි.
උත්සවයකදී අදහස් දක්වමින් අමාත්යවරයා සඳහන් කළේ, දිවයිනේ පොදු ප්රවාහන පද්ධතිය නවීකරණය කිරීමේ රජයේ සැලැස්මට අනුව මෙම දුම්රිය ව්යාපෘතියේ පළමු අදියර 2030 වසර වන විට අවසන් කිරීමට ඉලක්ක කර ඇති බවයි.
මෙම පළමු අදියර යටතේ වැඩි මගී ඉල්ලුමක් පවතින ප්රධාන මගී කොරිඩෝ තුනක් කෙරෙහි අවධානය යොමු කෙරේ.
ඒ අනුව, කොළඹ කොටුව සිට රාගම දක්වා වූ ප්රධාන මාර්ගය, කොළඹ කොටුව සිට පානදුර දක්වා වූ මුහුදුබඩ මාර්ගය සහ මරදාන සිට මාකුඹුර දක්වා වූ කැලණිවැලි මාර්ගය මෙම ව්යාපෘතියට ඇතුළත් වේ.
මෙම ව්යාපෘතිය යටතේ දුම්රිය ස්ථාන අලුත්වැඩියා කිරීම සහ නව දුම්රිය ස්ථාන ඉදිකිරීම ඇතුළු දුම්රිය යටිතල පහසුකම් සැලකිය යුතු ලෙස නවීකරණය කිරීමට ද නියමිතය.
නව දුම්රිය ස්ථාන හුදෙක් ටිකට්පත් නිකුත් කරන සාම්ප්රදායික ස්ථානවලින් ඔබ්බට යමින්, මගීන් සඳහා නවීන පහසුකම් සහ අතිරේක සේවාවලින් සමන්විත වන බව අමාත්යවරයා වැඩිදුරටත් සඳහන් කළේය.
