ගුරුවරුන් ඇතුළු අධ්යාපන ක්ෂේත්රයේ වෘත්තිකයන් අනිවාර්ය ලියාපදිංචිය, වෘත්තීය බලපත්ර ලබාදීම සහ ගුණාත්මකභාවය සහතික කිරීම ඇතුළත් නව ක්රමවේදයක් යටතට ගෙන ඒමට පියවර ගනිමින් සිටින බව වාර්තා වේ.
අධ්යාපන අමාත්යාංශයේ ලේකම් නාලක කළුවැව මහතා Sunday Observer පුවත්පතට අදහස් දක්වමින් සඳහන් කර ඇත්තේ, අධ්යාපන සභාව පිහිටුවීම සඳහා වන පනත් කෙටුම්පත සකස් කිරීමට අමාත්ය මණ්ඩල අනුමැතියෙන් අනතුරුව නීති කෙටුම්පත් සම්පාදකවරයාට උපදෙස් ලබාදී ඇති බවයි.
එම පනත් කෙටුම්පත් කිරීමේ කටයුතු මේ වන විට වේගවත් කර ඇති බවද ඔහු සඳහන් කර තිබේ.
“යෝජිත අධ්යාපන සභාව මේ වන විට නීති කෙටුම්පත් කිරීමේ අදියරට පැමිණ තිබෙනවා” යැයි පවසා ඇති ලේකම්වරයා, එම ආයතනය හැකි ඉක්මණින් පිහිටුවීමට රජය අපේක්ෂා කරන බවද පෙන්වා දී ඇත.
ජ්යෙෂ්ඨ මහාචාර්ය ඕ.ජී. දයාරත්න මහතාගේ ප්රධානත්වයෙන් යුත් කමිටුවක නිර්දේශ සහ ඉන් අනතුරුව සිදුකළ සමාලෝචන මත පදනම්ව මෙම පියවර ගෙන තිබේ.
මෙරට සාමාන්ය අධ්යාපන ක්ෂේත්රයේ ප්රමිතීන් සහ ගුණාත්මකභාවය ශක්තිමත් කිරීමේ අරමුණින් අග්රාමාත්ය සහ අධ්යාපන අමාත්ය හරිනි අමරසූරිය මහත්මිය විසින් මෙම සභාව පිහිටුවීමේ යෝජනාව ඉදිරිපත් කර ඇත.
යෝජිත අධ්යාපන සභාව මගින් ගුරුවරුන්, විදුහල්පතිවරුන්, ගුරු උපදේශකයන්, ගුරු අධ්යාපනඥයන් සහ අධ්යාපන පරිපාලකයන් නියාමනය කිරීමට නියමිතය.
ප්රමිතිකරණය, ලියාපදිංචි කිරීම, වෘත්තීය බලපත්ර ලබාදීම, ගුණාත්මකභාවය සහතික කිරීම සහ පිළිගැනීම ලබාදීම (accreditation) එහි ප්රධාන කාර්යයන් අතර වේ.
එමෙන්ම ගුරුවරුන්ගේ අඛණ්ඩ වෘත්තීය සංවර්ධනය දිරිගැන්වීම සඳහා වෘත්තීය ඇගයීම් ශ්රේණිගත කිරීමේ ක්රමවේදයක් (professional rating system) හඳුන්වාදීමටද සැලසුම් කර තිබේ.
සමස්ත අධ්යාපන ක්ෂේත්රය තුළ ඉහළ ප්රමිතියක් පවත්වාගෙන යාම සහ දිරිගැන්වීම අරමුණු කරගත් මෙම නව ව්යූහය පෞද්ගලික අධ්යාපන ආයතන වෙතද ව්යාප්ත කරන බව අධ්යාපන අමාත්යාංශයේ ලේකම් නාලක කළුවැව මහතා වැඩිදුරටත් සඳහන් කර ඇත.
