තෙත් කලාපයේ ප්රධාන ජලාශවල ජල මට්ටම සම්බන්ධයෙන් මේ වනවිට ගැටලුවක් නොමැති වුවද, වියළි කලාපයේ ජලාශවල ජල ධාරිතාව වේගයෙන් පහළ යමින් පවතින බව වාරිමාර්ග දෙපාර්තමේන්තුව පවසයි.
වාරිමාර්ග අධ්යක්ෂ ඉංජිනේරු එල්. එස්. සූරියබණ්ඩාර මහතා සඳහන් කළේ හම්බන්තොට, මඩකලපුව, මොනරාගල, මන්නාරම සහ ත්රිකුණාමලය ඇතුළු දිස්ත්රික්කවල ඇතැම් ජලාශවල ජල ධාරිතාව මේ වනවිට 30%කටත් අඩු මට්ටමකට පහත වැටී ඇති බවයි.
දිවයිනේ ප්රධාන ජලාශ 74හි සමස්ත ජල ධාරිතාවද 36%ක් දක්වා පහත වැටී ඇති බව ඔහු පැවසීය.
සාමාන්යයෙන් අගෝස්තු මාසයේදී වියළි කාලගුණයක් පැවතියද, මේ වසරේ එල් නිනෝ කාලගුණික තත්ත්වයේ බලපෑම හේතුවෙන් එම තත්ත්වය වඩාත් උග්ර වී ඇති බවද ඔහු සඳහන් කළේය. පවතින අධික උෂ්ණත්වය හේතුවෙන් ජලාශවල ජලය වේගයෙන් වාෂ්පීකරණය වීමද ජල හිඟයට බලපා තිබේ.
දැඩි වියළි කාලගුණයක් පවතින ප්රදේශවල පානීය හා පාරිසරික අවශ්යතා සඳහා ජලය වෙන් කිරීමට සිදුවන බැවින්, වගා කටයුතු සඳහා ජලය නිකුත් කිරීම සීමා කිරීමට සිදුවිය හැකි බවද වාරිමාර්ග අධ්යක්ෂවරයා පැවසීය.
පානීය ජල සැපයුම මෙතෙක් සීමා කර නොමැති නමුත් ඇතැම් ප්රදේශවල වගාවන් සඳහා නිකුත් කරන ජල ප්රමාණය සීමා කිරීමට පියවර ගෙන ඇති බවද ඔහු සඳහන් කළේය.
මේ අතර, එල් නිනෝ බලපෑම හේතුවෙන් දිස්ත්රික්ක 7ක ප්රාදේශීය ලේකම් කොට්ඨාස 23ක් වියළි කාලගුණයෙන් බලපෑමට ලක්ව ඇති බව ආපදා කළමනාකරණ මධ්යස්ථානය පවසයි.
පවුල් 25,628කට අයත් පුද්ගලයින් 81,865 දෙනෙකු මෙම තත්ත්වයෙන් බලපෑමට ලක්ව ඇති අතර, ප්රාදේශීය ලේකම් කොට්ඨාස 20ක පවුල් 23,048කට අයත් පුද්ගලයින් 72,153 දෙනෙකු සඳහා පානීය ජලය බෙදා හැරීමට පියවර ගෙන තිබේ.
අධික උණුසුම හා වියළි කාලගුණය හේතුවෙන් ලැව්ගිනි වේගයෙන් පැතිර යාමේ අවදානමක් පවතින බැවින් ජනතාව ඒ පිළිබඳව අවධානයෙන් සිටිය යුතු බවද වාරිමාර්ග අධ්යක්ෂවරයා අවධාරණය කළේය.
