ප්රවීණ ශ්රී ලාංකේය ගායිකා විශාරද ආචාර්ය නන්දා මාලිනී මහත්මියගේ අභාවය වෙනුවෙන් අගෝස්තු 21, 22 සහ 23 යන දින තුන ජාතික ශෝක දින ලෙස රජය විසින් ප්රකාශයට පත්කර තිබේ.
රජයේ ප්රවෘත්ති දෙපාර්තමේන්තුව සඳහන් කළේ, අභාවප්රාප්ත නන්දා මාලිනී මහත්මියගේ දේහය මහජන ගෞරවය සඳහා අද (21) පෙ.ව. 10.00 සිට හෙට (22) ප.ව. 3.30 දක්වා නුගේගොඩ, නාවල පාරේ අංක 30, විජයබා මාවතේ පිහිටි “නන්දා මාලිනී සංගීත ආශ්රමය” වෙත තැන්පත් කර තබන බවයි.
ඇයගේ අවසන් කටයුතු හෙට (22) ප.ව. 5.00ට බොරැල්ල කනත්ත පොදු සුසාන භූමියේදී සිදුකිරීමට නියමිතය.
නන්දා මාලිනී මහත්මිය ඊයේ (20) නාවල පිහිටි සිය නිවසේදී අභාවප්රාප්ත වූයේ 82 වැනි වියේ පසුවෙමිනි.
ජනාධිපති අනුර කුමාර දිසානායක මහතා X ගිණුමේ සටහනක් තබමින් ඇයගේ අභාවය පිළිබඳ සිය කණගාටුව පළකර ඇති අතර, නන්දා මාලිනී මහත්මිය “අපේ කාලයේ සැබෑ සංගීත පුරාවෘත්තයක්” ලෙස හඳුන්වා දී තිබේ.
ඇයගේ අකාලික සංගීතය තරුණ මහලු සියලු දෙනාගේ සිත් සතන් තුළ මහත් ආනුභාවයක් ඇති කළ බවත්, ඇයගේ විශිෂ්ට සංගීත උරුමය ලක්ෂ සංඛ්යාත ජනතාවගේ හදවත් තුළ සදාජීවමානව පවතිනු ඇති බවත් ජනාධිපතිවරයා වැඩිදුරටත් සඳහන් කර ඇත.
