ඕස්ට්රේලියාවේ පළමු වරට ක්ෂීරපායී සතෙකුට H5N1 කුරුලු උණ වෛරසය ආසාදනය වී ඇති බව තහවුරු කර තිබේ.
දකුණු ඕස්ට්රේලියා ප්රාන්තයේ බීච්පෝට් වෙරළබඩ නගරයෙන් හමුවූ දිගු නාසයක් සහිත සීල් සතෙකුගෙන් මෙම වෛරසය හඳුනාගෙන ඇති බව බලධාරීහු පවසති. ඇඩිලේඩ් නගරයට කිලෝමීටර් 310ක් පමණ දකුණින් මෙම සත්වයා හමුවී තිබේ.
ප්රාන්තයේ වෙරළබඩ ප්රදේශවල ජීවත් වන සීල් සතුන් 100,000ක පමණ ගහනයෙන් එකෙකු වූ මෙම සත්වයා කිසිදු තුවාල සලකුණකින් තොරව මියගොස් සිටියදී හමුවී ඇත.
ඕස්ට්රේලියාවට H5N1 වෛරසය පසුගිය ජූනි මාසයේදී පැමිණීමෙන් පසු එහි ව්යාප්තිය ඉහළ ගොස් ඇති අතර, සංක්රමණික මුහුදු පක්ෂීන්ගෙන් දේශීය විශේෂ වෙතද වෛරසය පැතිර ගොස් තිබේ. මේ මස මුලදී විශාල වශයෙන් මුහුදු පක්ෂීන් මියයාමේ සිදුවීම්ද වාර්තා විය.
දකුණු ඕස්ට්රේලියාවේ ප්රධාන පශු වෛද්ය නිලධාරී ස්කය් ෆ්රෝන් සඳහන් කළේ සීල් සතුන් වෙරළබඩ ගල්පරවල පක්ෂීන් ආසන්නයේ ජීවත් වන බැවින් වෛරසයට නිරාවරණය වීමේ වැඩි අවදානමක් පවතින බවයි.
කෙසේ වෙතත්, ෆෙඩරල් රජයට අනුව H5N1 වෛරසය මෙතෙක් ඕස්ට්රේලියාවේ කුකුළු මස් හෝ කෘෂිකාර්මික ක්ෂේත්රය තුළින් වාර්තා වී නොමැති අතර, සිකුරාදා වන විට රට පුරා වෛරසය ආසාදිත සිදුවීම් 297ක් තහවුරු වී තිබේ.
