නේපාලයට පසුගිය සතියේ බලපෑ දරුණු ගංවතුර තත්ත්වයෙන් පසු ජල විදුලි ව්යාපෘතිවල උමං මාර්ග තුළ සිරවී සිටින බවට විශ්වාස කෙරෙන සිය ගණනක් පිරිස් වෙත ළඟාවීම සඳහා නේපාල මුදාගැනීමේ කණ්ඩායම් චීන සහ ඉන්දීය විශේෂඥයන්ගේ සහාය ඇතිව මෙහෙයුම් වේගවත් කර තිබේ.
ගල්, මඩ සහ නායගිය කොටස් රැගෙන පැමිණි මෙම අනපේක්ෂිත ගංවතුර ප්රවාහය පසුගිය බදාදා නේපාලයේ ගම්මාන සහ නගර මෙන්ම චීන දේශසීමා ප්රදේශ හරහාද විශාල විනාශයක් සිදුකරමින් ගලා ගොස් තිබේ. ඒ හේතුවෙන් පුද්ගලයින් 900කට වැඩි පිරිසක් මියගොස් තවත් 5,000කට ආසන්න පිරිසක් අතුරුදන්ව ඇති බව වාර්තා වේ.
මෙම ඛේදවාචකයට හේතුව හිමකඳු නායයාමක් බවට සැක කෙරේ.
කඳුකරයේ සිට පහළට ගසාගෙන ආ සිරුරු නේපාලයේ තැනිතලා ප්රදේශවල පවතින අධික ආර්ද්රතාව සහිත කාලගුණය හේතුවෙන් නරක්වීමට පටන් ගැනීමත් සමඟ හඳුනා නොගත් සිරුරු සිය ගණනක් නොගැඹුරු වළවල් තුළ මිහිදන් කිරීමට පියවර ගෙන තිබේ.
දැඩි ලෙස හානියට පත් රසූවා සහ නුවාකොට් දිස්ත්රික්ක දෙකෙහි ජල විදුලි ව්යාපෘති 11ක සිරවී සිටින බවට විශ්වාස කෙරෙන කම්කරුවන් 933 දෙනෙකු වෙත ළඟාවීම කෙරෙහි මුදාගැනීමේ මෙහෙයුම්වල ප්රධාන අවධානය යොමු වී ඇති බව නේපාල බලධාරීහු පවසති. ඉන් බහුතරයක් උමං මාර්ග අටක පමණ සේවයේ නිරතව සිටි කම්කරුවන් බව සඳහන් වේ.
මුදාගැනීමේ කණ්ඩායම් විසින් ලබාගත් ඡායාරූප සහ වීඩියෝ දර්ශනවල රාත්රී කාලයේ විදුලි ආලෝකය යටතේ බැකෝ යන්ත්ර භාවිත කරමින් පස් සහ ගල් ඉවත් කරන ආකාරය දැක්වේ.
ජලය සහ මඩ ඉවත් කරමින් සිරවී සිටින පිරිස් වෙත ළඟාවීම සඳහා බැකෝ යන්ත්ර සහ සෙවුම් ආලෝක ධාරා භාවිත කරන බව නේපාල හමුදාව සඳහන් කරයි.
උමං මාර්ග දෙකකට ඇතුළු වීමෙන් පසු මුදාගැනීමේ කණ්ඩායම් විසින් සිරුරු තුනක් සොයාගෙන ඇති අතර, මඩෙන් වැසී ඇති අනෙකුත් ප්රදේශවල සෙවුම් මෙහෙයුම් තවදුරටත් ක්රියාත්මක වේ.
“විශාල වශයෙන් අපද්රව්ය සහ පස් තැන්පත් වී තිබීම උමං මාර්ග විවෘත කිරීමට මහත් බාධාවක් වී තිබෙනවා. අපගේ ප්රධාන අවධානය යොමු වී තිබෙන්නේ උමං මාර්ග විවෘත කර ගැනීමටයි,” යනුවෙන් නේපාල හමුදා ප්රකාශක රාජා රාම් බස්නෙට් පැවසීය.
