ඉන්දියාවේ උත්තරාඛන්ද් ප්රාන්තයේ 30 හැවිරිදි රූපලාවණ්ය ශිල්පිනියක වන රේණු ධාරියාල්, ලොව දිගුම කෙස් කලඹ හිමි ජීවමාන කාන්තාව ලෙස ගිනස් ලෝක වාර්තාවක් පිහිටුවා තිබේ.
හල්ද්වානි නගරයේදී ගිනස් ලෝක වාර්තා නිලධාරීන් ඉදිරියේ සිදුකළ මිනුම්වලදී ඇගේ කෙස් කලඹේ දිග අඩි 8යි අඟල් 11ක් හෙවත් මීටර් 2.71ක් ලෙස සටහන් වී ඇත.
ඒ අනුව, යුක්රේනයේ ආලියා නසිරෝවා සතුව පැවති අඩි 8යි අඟල් 5ක වාර්තාව බිඳ දැමීමට රේණු සමත්ව තිබේ.
රේණු පවසන්නේ 2015 වසරේ සිට වසර 9කට ආසන්න කාලයක් තම හිසකෙස් නොකපා පවත්වාගෙන ගිය බවයි.
“ඉන්දියානු සංස්කෘතිය තුළ දිගු කෙස් කලඹක් සුන්දරත්වයේ සහ පරම්පරාගත උරුමයේ සංකේතයක්. මගේ පවුලේ අය සහ සංස්කෘතික ආභාෂය මෙම කැපවීම සඳහා මට විශාල ශක්තියක් ලබා දුන්නා,” යනුවෙන් ඇය සඳහන් කළාය.
තම කෙස් කලඹ නඩත්තු කිරීම සඳහා සතියකට වරක් විශේෂ ස්වාභාවික තෙල් සත්කාරයක් සිදුකරන රේණු, හිසකෙස් සේදීම සහ වියළා ගැනීම සඳහා පැය කිහිපයක් ගත කරන බවද සඳහන් කරයි.
කෙසේ වෙතත්, ලෝක ඉතිහාසයේ මෙතෙක් වාර්තා වූ දිගුම කෙස් කලඹ හිමි කාන්තාව ලෙස සැලකෙන්නේ චීනයේ ෂී කියුපිංග්ය. ඇගේ කෙස් කලඹේ දිග අඩි 18යි අඟල් 5ක් වූ අතර, ඇය මේ වන විට ජීවතුන් අතර නොමැත.
ඒ අනුව, දැනට ජීවත්ව සිටින කාන්තාවන් අතර දිගුම කෙස් කලඹ හිමි නිල ගිනස් ලෝක වාර්තා හිමිකාරිය ලෙස රේණු ධාරියාල් ඉතිහාසයට එක්ව තිබේ.
