පූකට් සිට දිල්ලි බලා පියාසර කරමින් තිබූ එයාර් ඉන්දියා ගුවන් යානයක් අඟහරුවාදා උදෑසන ගුවනේදී දැඩි කැළඹිලි තත්ත්වයකට ලක්වීමෙන් එහි ගමන්ගත් පුද්ගලයන් 17 දෙනෙකු තුවාල ලබා තිබේ.
එයාර්බස් A320 වර්ගයට අයත් AI2379 දරන මෙම ගුවන් යානය හදිසි කැළඹිල්ලකට ලක්වීමෙන් අඩි 300ක පමණ උසකින් පහතට වැටී ඇති අතර, පසුව පෙරවරු 11.30ට පමණ නවදිල්ලියේ ඉන්දිරා ගාන්ධි අන්තර්ජාතික ගුවන්තොටුපළ වෙත ආරක්ෂිතව ගොඩබස්වා ඇත.
සිද්ධිය වන අවස්ථාවේ යානය තුළ මගීන් 134 දෙනෙකු සහ කාර්ය මණ්ඩල සාමාජිකයන් 8 දෙනෙකු සිටි බව වාර්තා වේ. තුවාල ලැබූවන් අතර කැබින් කාර්ය මණ්ඩල සාමාජිකයන් සිව්දෙනෙකු ද සිටින බව සඳහන් වේ.
ගුවනේදී ඇති වූ දැඩි සෙලවීම හේතුවෙන් ආසන පටි පැළඳ නොසිටි මගීන් කිහිපදෙනෙකු ඉහළට විසිවී යානයේ සිවිලිම සහ ගමන් මලු තැබීමේ ස්ථානවල ගැටී තුවාල ලබා ඇත.
කුඩා ළමුන් ඇතුළු මගීන් කිහිපදෙනෙකු තුවාල ලබා ඇති අතර, මෙම අත්දැකීම තමන්ට “නැවත උපතක් ලැබූවාක් මෙන්” හැඟුණු බව ඇතැම් මගීන් ප්රකාශ කර තිබේ.
තුවාල ලැබූවන් ගුවන්තොටුපළ වෛද්ය අංශය මගින් පරීක්ෂා කිරීමෙන් අනතුරුව, පුද්ගලයන් 7 දෙනෙකු වැඩිදුර ප්රතිකාර සඳහා දිල්ලියේ වසන්ට් කුන්ජ් ප්රදේශයේ ෆෝටිස් රෝහලට ඇතුළත් කර ඇත.
ගුවන් යානය ආරක්ෂිතව ගොඩබස්වා ඇති බවත්, මගීන්ට සහ කාර්ය මණ්ඩලයට අවශ්ය වෛද්ය හා සහන පහසුකම් සපයන බවත් එයාර් ඉන්දියා සමාගම සඳහන් කර ඇත.
සිද්ධිය සම්බන්ධයෙන් ඉන්දියානු සිවිල් ගුවන් සේවා අධ්යක්ෂ ජනරාල් ආයතනය විශේෂ පරීක්ෂණයක් ආරම්භ කර තිබේ.
