වයස අවුරුදු 16ට අඩු සමාජ මාධ්‍ය පරිශීලකයින්ට සටහන් පළ කිරීම, අදහස් දැක්වීම සහ ප්‍රතිචාර දැක්වීම සීමා කිරීමට වියට්නාමය සැලසුම් කරමින් සිටින බව විදෙස් මාධ්‍ය වාර්තා කරයි.

රොයිටර් පුවත් සේවය නිරීක්ෂණය කළ කෙටුම්පත් නියෝගයකට අනුව, වයස අවුරුදු 16ට අඩු ළමුන්ගේ සමාජ මාධ්‍ය ගිණුම් දෙමව්පියන්ගේ හෝ නීත්‍යානුකූල භාරකරුවන්ගේ තොරතුරු භාවිත කර ලියාපදිංචි කළ යුතු වේ.

එමෙන්ම, ළමුන් භාවිත කරන සමාජ මාධ්‍ය අන්තර්ගතයන් සහ එහි ගත කරන කාලය අධීක්ෂණය කිරීමේ වගකීම දෙමව්පියන්ට හෝ භාරකරුවන්ට පැවරීමට යෝජනා කර තිබේ.

වයස හඳුනා ගැනීම සහ ළමුන්ට සුදුසු අන්තර්ගත පමණක් ලබාදීම තහවුරු කිරීම සඳහා සමාජ මාධ්‍ය සමාගම් තාක්ෂණික ක්‍රමවේද භාවිත කළ යුතු බවද යෝජිත නියෝගයේ සඳහන් වේ.

වියට්නාම නියෝජ්‍ය සංස්කෘතික අමාත්‍ය ෆාන් ටම් සඳහන් කර ඇත්තේ, මෙම පියවරේ අරමුණ ළමුන්ට සමාජ මාධ්‍ය භාවිතය සම්පූර්ණයෙන් තහනම් කිරීම නොව, ඔවුන් ආරක්ෂිත හා වයසට ගැළපෙන ඩිජිටල් පරිසරයක සිටින බව තහවුරු කිරීම බවයි.

මීට අමතරව, අන්තර්ජාල ක්‍රීඩා සඳහාද නව සීමාවන් හඳුන්වාදීමට වියට්නාමය යෝජනා කර තිබේ.

ඒ අනුව, වීඩියෝ ක්‍රීඩා සේවා සපයන්නන් පරිශීලකයන්ගේ වයස තහවුරු කළ යුතු අතර, වයස අවුරුදු 16ට අඩු ගිණුම් දෙමව්පියන් හෝ භාරකරුවන් හරහා ලියාපදිංචි කළ යුතු වේ.

එමෙන්ම, එකම සමාගමක ක්‍රීඩා සඳහා වයස අවුරුදු 16ට අඩු ළමුන්ට දිනකට ක්‍රීඩා කළ හැකි කාලය විනාඩි 60කට සීමා කිරීමටද යෝජනා කර ඇත.

කෙසේ වෙතත්, මෙම කෙටුම්පත් නියෝගය තවමත් අවසන් කර නොමැති අතර, සම්මත කිරීමට පෙර වෙනස්කම් සිදුවිය හැකි බව රොයිටර් පුවත් සේවය වාර්තා කරයි.