පූජ්‍ය ගලගොඩඅත්තේ ඥානසාර හිමියන් යළි බන්ධනාගාරගත කිරීමට හේතු වූ අධිකරණ තීන්දුවේ සඳහන් තාක්ෂණික දෝෂය සම්බන්ධයෙන් හිටපු ජනාධිපති මෛත්‍රීපාල සිරිසේන මහතා විශේෂ ප්‍රකාශයක් නිකුත් කර තිබේ.
මහා සංඝරත්නය, මාධ්‍යවේදීන් සහ මහජනතාව මේ සම්බන්ධයෙන් මතු කරන ප්‍රශ්නවලට පිළිතුරු සැපයීමේ අරමුණින් මෙම ප්‍රකාශය නිකුත් කළ බව ඔහු සඳහන් කරයි.
ඥානසාර හිමියන් නිදහස් කිරීමේදී ජනාධිපති කාර්යාලය විසින් අධිකරණයට ඉදිරිපත් කළ ලේඛනවල තාක්ෂණික දෝෂයක් පැවති බව අදාළ අධිකරණ තීන්දුවේ සඳහන් වන බව හිටපු ජනාධිපතිවරයා පවසයි. එම අධිකරණ තීරණය සම්පූර්ණයෙන්ම නිවැරදි බවත්, තමන් එයට ගරු කරන බවත් ඔහු අවධාරණය කරයි.
ඥානසාර හිමියන්ට එරෙහිව හෝමාගම මහේස්ත්‍රාත් අධිකරණයේ අධිකරණයට බාධා කිරීම සහ අධිකරණයට අපහාස කිරීම සම්බන්ධයෙන් නඩු දෙකක් විභාග වී තිබේ. එම නඩු සම්බන්ධයෙන් සමාව ලබාදීමේ ලේඛන අධිකරණ හා බන්ධනාගාර අමාත්‍යාංශයට යවා අනුමැතිය ලබාගත යුතුව තිබූ බව ඔහු සඳහන් කරයි.
ජනාධිපති කාර්යාලයේ නීති අංශය භාර අතිරේක ජ්‍යෙෂ්ඨ ලේකම්වරිය මේ සම්බන්ධයෙන් තමන් දැනුවත් කර තිබුණද, අදාළ ඉල්ලීම අමාත්‍යාංශයට යොමු කර නොතිබූ බව මෛත්‍රීපාල සිරිසේන මහතා පවසයි. ඒ අනුව, අමාත්‍යාංශ අනුමැතියකින් තොරව තම අත්සන පමණක් ලබාගෙන තිබූ බවත්, එමගින් තමන් නොමඟ යවා ඇති බවත් ඔහු සඳහන් කරයි.
පාක්‍යසෝති සරවනමුත්තු මහතාට සම්බන්ධ රාජ්‍ය නොවන සංවිධානයක් හරහා සන්ධ්‍යා එක්නැලිගොඩ මහත්මිය ඉදිරිපත් කළ පැමිණිල්ලක් මෙම නීතිමය ක්‍රියාමාර්ගයට සම්බන්ධ වූ බවද ඔහු ප්‍රකාශ කරයි.
එවකට ජනාධිපති කාර්යාලයේ නිලධාරීන් අතින් සිදුවූ බව කියන මෙම දෝෂය හේතුවෙන් ඥානසාර හිමියන්ට යළි බන්ධනාගාරගත වීමට සිදුවූ බව පවසන හිටපු ජනාධිපතිවරයා, ඒ සම්බන්ධයෙන් මහා සංඝරත්නයෙන් කොන්දේසි විරහිතව සමාව ඉල්ලා සිටියේය.
අන්තර්ජාලයෙන් ලබාගත් අදාළ අධිකරණ තීන්දුවේ පිටපතක් අධ්‍යයනය කිරීමෙන් පසුව මෙම කරුණු අනාවරණය කරගත් බවද මෛත්‍රීපාල සිරිසේන මහතා වැඩිදුරටත් සඳහන් කරයි.
