ශ්රී ලංකා මුහුදු සීමාවේ ඛනිජ තෙල් සහ ස්වාභාවික වායු ගවේෂණය හා සංවර්ධනය සඳහා නව බලපත්ර ලබාදීමේ වැඩපිළිවෙළ අද (25) ආරම්භ කරන බව ශ්රී ලංකා ඛනිජ තෙල් සංවර්ධන අධිකාරිය පවසයි.
ඒ අනුව, මෙරට ඛනිජ තෙල් සම්පත් ගවේෂණය සහ සංවර්ධනය සඳහා ජාත්යන්තර බලශක්ති සමාගම් වෙත ලංසු ඉදිරිපත් කිරීමට ආරාධනා කිරීමට නියමිතය.
මෙහි ප්රධාන අරමුණ වන්නේ ශ්රී ලංකා මුහුදු තීරයේ තෙල් සහ ස්වාභාවික වායු ගවේෂණය හා නිෂ්පාදනය සඳහා ගෝලීය බලශක්ති සමාගම් ආකර්ෂණය කර ගැනීමයි.
මෙතෙක් සිදුකර ඇති ගවේෂණවලින් බටහිර වෙරළට ඔබ්බෙන් වාණිජමය වශයෙන් සාර්ථක විය හැකි ස්වාභාවික වායු තැන්පතු පවතින බව තහවුරු වී ඇති බව සඳහන් වේ. එම සම්පත් සංවර්ධනය කිරීම මගින් රටේ බලශක්ති සුරක්ෂිතතාව ශක්තිමත් කිරීමට සහ කාර්මික වර්ධනයට සහාය වීමට අපේක්ෂා කෙරේ.
බලපත්ර ලබාදීමේ ක්රියාවලිය පිළිබඳ වැඩිදුර තොරතුරු අද පැවැත්වෙන මාධ්ය හමුවකදී ප්රකාශයට පත් කිරීමට නියමිතය.
ශ්රී ලංකාවේ තෙල් ගවේෂණ කටයුතු 1960 දශකයේ අගභාගය දක්වා දිවෙන අතර, 2011 වසරේදී කෙයාන් ලංකා සමාගම මන්නාරම් ද්රෝණියේ ළිං දෙකක් හාරා ‘බැරකූඩා’ සහ ‘ඩොරාඩෝ’ ප්රදේශවල ස්වාභාවික වායු සොයා ගැනීමත් සමඟ සැලකිය යුතු ප්රගතියක් අත්කරගෙන තිබේ.
මන්නාරම් ද්රෝණියේ කැබලි හතරක ගවේෂණ හා නිෂ්පාදන කටයුතු සඳහා ආයෝජන යෝජනා කැඳවීමට රජය සැලසුම් කර ඇත. මේ සඳහා කැබිනට් අනුමැතිය 2025 මැයි මාසයේදී හිමිව තිබේ.
මීට පෙර අධිකරණමය ක්රියාමාර්ග හේතුවෙන් මෙම ක්රියාවලිය ප්රමාද වී තිබුණද, නවතම වාර්තාවලට අනුව නීතිමය බාධා ඉවත් කර ඇති බැවින් ජාත්යන්තර ලංසු තැබීමේ ක්රියාවලිය ඉදිරියට ගෙන යාමට අවස්ථාව හිමිව ඇත.
2021 අංක 21 දරන ඛනිජ තෙල් සම්පත් පනත මගින් ඛනිජ තෙල් ගවේෂණය සහ නිෂ්පාදනය සඳහා අවශ්ය නීතිමය රාමුව ද සකස් කර තිබේ.
මීට අමතරව, දේශීය ඉල්ලුම වර්ධනය කිරීම සහ මුහුදු තීරයේ පවතින වායු තැන්පතු වාණිජකරණය කිරීම සඳහා ආයෝජකයන්ට අවස්ථා සැලසීමේ අරමුණින් 2020 වසරේදී ස්වාභාවික වායු පිළිබඳ ජාතික ප්රතිපත්තිය ද ගැසට් කර ඇත.
2021 වසරේ පාර්ලිමේන්තු ඇස්තමේන්තුවකට අනුව මන්නාරම් ද්රෝණියේ තෙල් හා ගෑස් සම්පත්වල විභව වටිනාකම ඇමෙරිකානු ඩොලර් බිලියන 267ක් පමණ බව ප්රකාශ වී තිබුණද, එය වාණිජමය වශයෙන් නිසැකවම නිස්සාරණය කළ හැකි සංචිතවල වටිනාකම නොව එහි පවතින සම්පත්වල සමස්ත විභවතාව නිරූපණය කරන ඇස්තමේන්තුවක් බව සඳහන් වේ.
