නීතිවිරෝධී ලෙස උපයාගත් මුදල් භාවිත කරමින් මාතර ප්රදේශයෙන් අක්කර 1.5ක ඉඩමක් මිලදී ගත් බවට එල්ල වී ඇති චෝදනාවට අදාළ නඩුවට අධිකරණය හමුවේ පෙනීසිටීම දිගින් දිගටම මඟහැරීම හේතුවෙන් හිටපු අමාත්ය බැසිල් රාජපක්ෂ තැන්පත් කර තිබූ ඇප මුදල් රාජසන්තක කිරීමට මාතර මහේස්ත්රාත් අධිකරණය ඊයේ (18) නියෝග කළේය.
පොලිස් මූල්ය අපරාධ විමර්ශන කොට්ඨාසය (FCID) විසින් ගොනුකර ඇති මෙම නඩුව මාතර, එළියකන්ද පාරේ බ්රවුන්හිල් ප්රදේශයේ පිහිටි දේපළකට අදාළ වන අතර, එය මාතර ප්රධාන මහේස්ත්රාත් චතුර දිසානායක මහතා ඉදිරියේ කැඳවනු ලැබීය.
නඩුවේ තුන්වැනි විත්තිකරු වන බැසිල් රාජපක්ෂ මහතා, අධිකරණයට පිළිගත හැකි වෛද්ය වාර්තාවක් පවා ඉදිරිපත් නොකර දිගින් දිගටම අධිකරණය හමුවේ පෙනීසිටීම මඟහැර ඇති බව අධිකරණයට දැනුම් දී තිබේ.
එමෙන්ම බැසිල් රාජපක්ෂ මහතාගේ ඇපකරුවන් ලෙස අත්සන් කළ පුද්ගලයන් තිදෙනාට ද දඩ නියම කළ මහේස්ත්රාත්වරයා, එම දඩ මුදල් නොගෙවන්නේ නම් ඔවුන් බන්ධනාගාරගත කිරීමට නියෝග කළේය.
බැසිල් රාජපක්ෂ මහතාට එරෙහිව නිකුත් කර තිබූ අත්අඩංගුවට ගැනීමේ වරෙන්තුව 2026 ඔක්තෝබර් 27 වැනිදා දක්වා දීර්ඝ කර තිබේ.
නඩුවේ පළමු සහ දෙවැනි විත්තිකරුවන් ඊයේ අධිකරණය හමුවේ පෙනී සිටියහ. පැමිණිල්ල වෙනුවෙන් FCID නිලධාරීන් පෙනී සිටි අතර, ජනාධිපති නීතිඥ අනිල් ද සිල්වා මහතා ඇතුළු නීතිඥ මණ්ඩලයක් විත්තිය නියෝජනය කළහ.
