විනිසුරුවරුන්ගේ විශ්රාම වයස දීර්ඝ කිරීමේ යෝජනාව සම්බන්ධයෙන් සාකච්ඡා කිරීම සඳහා ශ්රී ලංකා නීතිඥ සංගමයේ නියෝජිතයින් මේ වනවිට ජනාධිපති ලේකම් කාර්යාලය වෙත පැමිණ තිබේ.
ජනාධිපති අනුර කුමාර දිසානායක මහතා විසින් ශ්රී ලංකා නීතිඥ සංගමයට ලබාදුන් සාකච්ඡා අවස්ථාවකට අනුව මෙම හමුව පැවැත්වෙයි.
ශ්රී ලංකා නීතිඥ සංගමය, විපක්ෂයේ දේශපාලන පක්ෂ, සිවිල් සංවිධාන මෙන්ම ජාත්යන්තර නීති සංවිධානවලින් ද විරෝධය එල්ල වී ඇති පසුබිමක, උපරිමාධිකරණ විනිසුරුවරුන්ගේ විශ්රාම වයස දීර්ඝ කිරීමට අදාළ ව්යවස්ථා සංශෝධනය කැබිනට් මණ්ඩලය විසින් පසුගියදා අනුමත කරනු ලැබීය.
ඒ අනුව, ඊට අදාළ විසි දෙවැනි ආණ්ඩුක්රම ව්යවස්ථා සංශෝධන පනත් කෙටුම්පත පසුගිය සිකුරාදා ගැසට් පත්රයේ පළ කෙරිණි.
මෙම යෝජනාව සම්බන්ධයෙන් ශ්රී ලංකා නීතිඥ සංගමය සිය ස්ථාවරය ජනාධිපතිවරයා වෙත ලිඛිතව දැනුම් දී තිබේ.
අධිකරණ අමාත්ය හර්ෂණ නානායක්කාර මහතා සමඟ පැවති හමුවකදී ද, මේ සම්බන්ධයෙන් ජනාධිපතිවරයා සමඟ සාකච්ඡා කිරීමට අවස්ථාවක් ලබාදෙන ලෙස ශ්රී ලංකා නීතිඥ සංගමය ඉල්ලීමක් කර තිබුණි.
ඒ අනුව, විනිසුරුවරුන්ගේ විශ්රාම වයස දීර්ඝ කිරීමේ යෝජනාව සම්බන්ධයෙන් ජනාධිපතිවරයා සහ ශ්රී ලංකා නීතිඥ සංගමයේ නියෝජිතයින් අතර මෙම සාකච්ඡාව පැවැත්වෙයි.
